Илон Маск ақшаның жойылатынын болжады: оның орнын не басады

Америкалық миллиардер Илон Маск болашақта ақшаның мәнін жоғалуы мүмкін, ал жасанды интеллект пен роботтар кез келген жұмысты адамнан жақсы атқаруды үйренеді деп есептейді, деп хабарлайды Tengri Life HuffPost-қа сілтеме жасап.

Кәсіпкер бұл туралы жазушы әрі өмірбаяншы Уолтер Айзексонмен болған The Builders подкастындағы әңгімесінде айтты.

Масктің пікірінше, робототехниканың дамуы мен ғарышты игеру әлемдік экономиканы толығымен өзгертуі мүмкін. Технологиялар тауарлар мен қызметтерді көп мөлшерде өндіруге мүмкіндік беретіні сонша, үйреншікті ақша бұрынғы рөлін атқарудан қалады.

Миллиардер ақшаның орнына экономиканың негізі ретінде физикалық ресурстар - энергия, қуат және масса болады деп болжайды.

"Егер экономиканың ауқымы жердегі деңгейден бірнеше есе асып түссе, адамдарды кез келген тауармен және қызметпен қамтамасыз ету өте оңай міндетке айналады", - деп түсіндірді Маск.

Әңгіме барысында Маскке технологиялар барлық дерлік жұмысты өз мойнына алған жағдайда адам өмірі қалай өзгеретіні туралы сұрақ қойылды.

Кәсіпкер адамзат жаңа жағдайларға бейімделіп, бақыттың басқа көздерін таба алады деп есептейді.

"Меніңше, адамдар бақытты болудың жолдарын табады. Мысалы, көптеген зейнеткер жұмыс істемесе де, өмірлеріне өте риза. Бірақ, шын мәнінде, адамдар жасанды интеллект пен роботтардан жақсырақ істей алатын ештеңе қалмайды деп ойлаймын", - деді Маск.

Сонымен қатар Маск байлар мен кедейлер арасындағы айырмашылық туралы пікір білдірді. Оның ойынша, байлықтың артуы адамның бақытты болатынын білдірмейді.

"Егер сіздің дәулетіңіз бір миллиардтан 10 миллиард долларға дейін өссе, бұл сізді 10 есе бақытты етпейді. Заттарыңыз да 10 есе көбеймейді", - деп атап өтті миллиардер.

Масктің айтуынша, мұндай дәулетке ие болу адамның алдына басқа міндет қояды - орасан зор ресурсты қалай тиімді басқару керек деген мәселе туындайды.

Дегенмен, кәсіпкер ақша мәнін жоғалтатын нақты мерзімді атаған жоқ.

Бізді Google-дың негізгі дереккөздер тізіміне қосыңыз