Инфляция деңгейі 11% төмендейді

Елде макроэкономикалық тұрақтандыру және халықтың әл-ауқатын арттыру бағдарламасы бекітілді. Оны Үкімет Ұлттық Банкпен және Қаржы нарығын реттеу агенттігімен 2026-2028 жылдары бірлесіп іске асырады. 

Ал елдегі инфляция деңгейін 11 пайызға төмендету үшін тиісті шешімдерді қабылдау көзделді. Бұл туралы Үкімет отырысында Премьер-министрдің орынбасары-Ұлттық экономика министрі Серік Жұманғарин мәлімдеді. Ол Мемлекет басшысының бұған дейінгі тапсырмаларының жүйелі орындалып жатқанын және кешегі Ұлттық құрылтайда жүктеген міндеттері бойынша атқарылатын шараларды баяндады.

Альмира Оразбай, тілші:

- Мемлекет басшысы кешегі Ұлттық құрылтайда жауаптыларға нақты міндет жүктеді. Енді Әрбір министр мен әкімнің, әрбір сала мен өңірдің іс жүзіндегі нәтижелері қажет. Бүгін үкімет отырысында Премьер-министрдің орынбасары-Ұлттық экономика министрі сөз алды. Ол негізгі басымдықты халықтың табысын арттыруға берілетінін мәлімдеді. «Биыл азаматтардың нақты табысының өсуі 2-3%-дан жоғары болуға тиіс», - деді Серік Жұманғарин. Бұған экономиканың тұрақты әрі сапалы өсуін қамтамасыз ету және инфляцияны төмендету есебінен қол жеткізілмек. 

Серік Жұманғарин, ҚР Премьер-министрінің орынбасары-Ұлттық экономика министрі:

- Экономиканың өсуі 5%-дан кем емес деңгейде қамтамасыз етіледі. Ол үшін негізгі капиталға салынған инвестициялар көлемі жалпы ішкі өнімге қатысты 18%-ға дейін жеткізіледі. Шикізатқа жатпайтын секторларды дамытуға, еңбек өнімділігін арттыруға, экономиканы технологиялық жаңартуға және цифрландыруға баса назар аударылатын болады. Проактивті инвестициялық саясат жүргізіліп, кәсіпкерлікті қолдау шаралары кеңейтіледі.

Сондай-ақ Серік Жұманғарин: «Жаңа Салық кодексін енгізу бойынша жұмыс тұрақты бақылауда», - деді. Кодекс қабылданған сәттен бастап жүйелі түсіндіру жұмыстары жүргізіліп жатыр екен. Барлық 20 өңірде 130 мыңға жуық бизнес өкілінің қатысуымен семинарлар ұйымдастырылған. 1 500-ге жуық сұрақ түсіп, олар бойынша түсініктемелер берілген. Бұдан бөлек, Президент тапсырмасын орындау аясында инфляцияны 11%-ға дейін төмендету үшін шаралар қабылданады.

Серік Жұманғарин, ҚР Премьер-министрінің орынбасары-ұлттық экономика министрі:

- Инфляцияны 9-11%-ға дейін төмендету үшін шаралар қабылданады. Азық-түлік тауарларының отандық өндірісін ұлғайтуға және ішкі нарықты молықтыруға, тауар нарықтарында теңгерімсіздіктерді болдырмауға, өнімді тиімді сақтау және тасымалдау бойынша инфрақұрылымды дамытуға баса назар аударылатын болады. Осы жылдан бастап әлеуметтік маңызы бар азық-түлік тауарларының тізбесі 19-дан 31-ге дейін кеңейтілді. Табиғи монополиялар субъектілерінің қызметтеріне тарифтердің өсуінен инфляцияға әсер инфляцияның нысаналы параметрлеріне байланысты шектелетін болады.

Ел экономикасының тұрақты дамуының маңызды факторы шағын және орта бизнес екені мәлім. Бұл тұста әкімшілік жүктемені азайтып және қолдау көрсете отырып, бизнесті жүргізу жағдайларын жақсарту бойынша жүйелі шараларды одан әрі жалғастыру көзделіп отыр. 

Авторлары: Альмира Оразбай Марат Диханбаев