Иран Әзербайжанға жасалған соққыға қатысы жоқ екенін мәлімдеді

— Иран көршілес елдерге соққы жасамайды. Бұл оқиға мұқият тергеуді қажет етеді, — деді дипломат AnewZ телеарнасына берген сұхбатында.

Iran’s Deputy Foreign Minister Kazem Gharibabadi has responded to reports that drones struck Nakhchivan International Airport in Azerbaijan, saying Tehran does not target neighbouring countries and that the incident must be investigated.
Gharibabadi who was speaking to AnewZ… pic.twitter.com/zkL9OVOPfB

— AnewZ (@Anewz_tv) March 5, 2026

Ол Ислам Республикасының қорғаныс стратегиясы таңдамалы сипатқа ие екенін атап өтті. Оның айтуынша, Иран тек өз қарсыластарының әскери базаларын орналастыруға аумағын пайдалануға мүмкіндік беретін мемлекеттерді ғана нысанаға алуы мүмкін.

Сонымен қатар, Иран Қарулы күштері Бас штабы да арнайы мәлімдеме жасап, Әзербайжан бағытында дрондардың ұшырылғаны туралы ақпаратты жоққа шығарды.

Алайда Әзербайжанның Қорғаныс министрлігі Иранның бұл шабуылға қатысы бар екенін мәлімдеді.

— Иранның бүгін Әзербайжанға қарсы жасалған дрон шабуылын жоққа шығаруы қабылданбайды. Біз Иран Ислам Республикасының Қарулы күштері бұл өрескел мәлімдемелерін тоқтатып, болған оқиға үшін кешірім сұрап, кінәлілерді тиісті жауапкершілікке тартады деп күтеміз. Иран Қарулы күштеріне тиесілі төрт ұшқышсыз ұшу аппараты Нахчыван өңіріне шабуыл жасау мақсатында бағытталған. Оның бірін Әзербайжан әскері жойды, ал қалғандары азаматтық инфрақұрылымды, соның ішінде сабақ өтіп жатқан кезде орта мектеп ғимаратын нысанаға алған. Бақытымызға қарай, мектепке бағытталған дрон мақсатына жетпей, ғимараттың жанында құлап, жарылды, — делінген ведомство мәлімдемесінде.

Нахчывандағы оқиғадан кейін Әзербайжан президенті Ильхам Әлиев шұғыл түрде елдің Қауіпсіздік кеңесін шақырды.

— Әзербайжанға қарсы жасалған бұл негізсіз террор мен агрессия актісіне төзбейміз, — деді мемлекет басшысы.

Ильхам Әлиевтің айтуынша, болған жағдайға байланысты елдің Қарулы күштеріне жауап шараларын әзірлеп, іске асыру тапсырылған. Ол Әзербайжан өз қауіпсіздігі мен аумақтық тұтастығын қорғау үшін барлық қажетті қадамдарды жасайтынын атап өтті.

Бұған дейін Әзербайжан БАҚ-тары елдің эксклав аймағының аумағына Иран жағынан келген болуы мүмкін ұшқышсыз ұшу аппараттары құлағанын хабарлаған еді. Оқиға салдарынан инфрақұрылымға зақым келіп, зардап шеккендер тіркелген.