Иран Кувейттегі американдық базаларға шабуыл жасап, Black Hawk тікұшақтарын жойды БАҚ

Иран әскері Кувейт аумағындағы АҚШ әскери базаларына шабуыл жасады. Сондай-ақ Иорданиядағы америкалық әуе базаларына жасалған соққылар салдарынан бірнеше қымбат Black Hawk тікұшағы зақымданған, деп хабарлайды Tengrinews.kz тілшісі New York Times-ке сілтеме жасап.

БАҚ мәліметінше, Иран әскері Кувейттегі АҚШ-тың екі ірі әскери нысанына — Эль-Адири лагеріне және Али-эс-Салем әуе базасына камикадзе-дрондармен соққы жасаған.

Иран тарапы Эль-Адири лагеріне жасалған шабуыл АҚШ соққыларына жауап ретінде жүргізілген операцияның 16-толқыны аясында жүзеге асқанын мәлімдеді. Тегеранның мәліметінше, шабуыл нысандарының бірі АҚШ армиясының оқ-дәрі қоймасы болған.

Сондай-ақ Али-эс-Салем әуе базасындағы Patriot зениттік зымыран кешендері мен радиолокациялық станцияларға соққы жасалғаны хабарланды.

The New York Times басылымы Иранның Иорданиядағы америкалық әскери нысандарға жасаған шабуылдары салдарынан Black Hawk тікұшақтарының едәуір бөлігі зақымданғанын жазды.

Басылым дереккөздерінің мәліметінше, әңгіме соңғы бес күнде жасалған бірнеше шабуыл туралы болып отыр. Елдің шығысындағы ханзада Хасан атындағы әскери база да соққыға ұшыраған. Бұл базада АҚШ-тың қымбат әскери тікұшақтары орналасқан.

"Иранның Иорданияға жасаған соққылары кезінде әрқайсысының құны шамамен 21 миллион доллар болатын Black Hawk тікұшақтарының едәуір бөлігі зақымданды", — делінген материалда.

Басылым мәліметінше, шабуыл салдарынан бес әскери қызметкер жарақат алған.

Бұған дейін АҚШ Қарулы күштерінің Орталық қолбасшылығы Иран аумағына кезекті соққылар сериясы басталғанын мәлімдеген. Сирик, Бендер-Аббас қалалары мен Кешм аралында жарылыстар болғаны хабарланды.

Вашингтон мен Тегеран 8 шілдеде өзара соққыларды қайта бастады. АҚШ президенті Дональд Трамп Иранды Ормуз бұғазындағы коммерциялық кемелерге шабуыл жасады деп айыптап, бұған дейінгі бітімнің күші жойылғанын мәлімдеді.

Кейін Иран АҚШ аймақтағы жағдайға араласуын тоқтатқанға дейін Ормуз бұғазы жабық болатынын хабарлады.

Шиеленістің жаңа кезеңі тараптар қақтығысты тоқтатуға бағытталған меморандумға қол қойғаннан кейін үш апта өткен соң басталды.

Google News арқылы жаңалықтарымызды қадағалаңыз