Иран Ормуз бұғазы арқылы транзиттен қанша табыс түскенін айтты

Оның айтуынша, бұғаз арқылы өтетін кемелерден алынатын транзиттік төлемдерден түскен алғашқы қаражат Иранның Орталық банкінің шотына аударылған. Ақпаратты жартылай ресми Tasnim News Agency агенттігі таратты.

Хаджибабаи АҚШ тарапынан қысым мен қауіп-қатер саясаты жалғасатын болса, Ормуз бұғазының толық ашылмауы мүмкін екенін айтты. Ол Иранның ұстанымы «келіссөз емес, өз құқығын талап ету» екенін атап өтті.

— Иран халқының талабы — Ормуз бұғазы Иранға тиесілі болуы керек, ал одан өтетін барлық кемелер ұлттық валюта — риалмен салық төлеуі тиіс, — деді ол.

Шенеунік бұғаздың стратегиялық маңызын да еске салды. Оның айтуынша, Ормуз арқылы әлемдік мұнай саудасының шамамен 20%-ы және табиғи газдың 35%-ы өтеді. Сондықтан бұл аймақты бақылау Иранның халықаралық экономикадағы рөлін күшейтеді.

Хаджибабаи транзиттік төлемдерден алғашқы табыстар түскенін растағанымен, нақты қандай кемелерден және қандай мерзімде алынғаны туралы ақпарат бермеді.

Бұған дейін АҚШ пен Израильдің Иранға жасаған соққыларынан кейін басталған шиеленіс кезінде Ормуз бұғазы уақытша жабылғаны хабарланған болатын.

Сонымен қатар, Иран парламенті бұғаз арқылы өтетін кемелерден ақы алу туралы заң жобасын әзірлеп жатыр. Жобаға сәйкес, төлемдер иран риалымен белгіленуі мүмкін.

Айта кетейік, Иран Ормуз бұғазы арқылы транзит үшін есеп айырысуды риалмен жүргізуді ұсынды.