Иран Түркияға зымыран шабуылдарын тексеру үшін бірлескен топ құруды ұсынды

Иран президенті Масуд Пезешкиан Түркия президенті Режеп Тайип Ердоғанмен телефон әңгімесінде Иранның Түркия аумағына зымыран шабуылы туралы айыптауларды тексеру үшін бірлескен тергеу тобын құруды ұсынды. Тегеран айыптауларды жоққа шығарып, үшінші елдерді көршілер арасында алауыздық тудыруға тырысты деп айыптады. 

Түркияның Yeni Shafak басылымының Иран президенті әкімшілігіне сілтеме жасап  хабарлауынша, Пезешкиан айыптауларды жоққа шығарып, олардың көршілес мемлекеттер арасындағы қарым-қатынасты бұзуға бағытталғанын мәлімдеді. Ол Тегеранның Түркия аумағына ешқандай зымыран шабуылын жасамағанын баса айтты.

— Біз Иранға қарсы түрлі елдер мен режимдер таратқан мәлімдемелерді зерттеу үшін бірлескен топ құруға дайынбыз. Бұл үгіт-насихаттың достас және бауырлас екі мемлекет арасындағы қарым-қатынасқа әсер етуіне жол бермейді, — деп мәлімдеді Иран президенті.

Ол мұндай механизм Тегеран мен Анкара арасындағы стратегиялық серіктестікті сақтауға және дезинформацияның таралуына жол бермеуге көмектесетінін атап өтті.

Еске салсақ, 4 наурызда Түркия қорғаныс министрлігі Ираннан бағытталған зымыранның жойылғанын хабарлады. 

Кейіннен Ердоған Ираннан ұшырылған зымыранның жойылуына қатысты пікір білдірді. 

Өз кезегінде НАТО Түркияға жасалған зымыран шабуылынан кейін әскери дайындығын күшейтетіні мәлім болды. 

Осыған дейін Түркияда Ираннан ұшырылған баллистикалық оқ-дәрі жойылғанын жаздық. 

Сондай-ақ Иран зымыран соққыларының саны мен қуатын арттыратыны хабарланды.