Иранда жоғары лауазымды әскери қолбасшыларды жерлеу рәсімі өтіп жатыр

Тегеранда АҚШ пен Израильмен болған қақтығыс кезінде қаза тапқан жоғары лауазымды ирандық қолбасшыларды жерлеу рәсімі өтіп жатыр, деп хабарлайды Arasha.kz.

Ирандық бұқаралық ақпарат құралдарының мәліметінше, жерлеу рәсімінде қаза тапқан бірқатар жоғары лауазымды әскери тұлғалармен қоштасу рәсімі ұйымдастырылған. Олардың қатарында Иран Қарулы күштері Бас штабының басшысы Абдулрахим Мусави, қорғаныс министрі Азиз Насирзаде, Ислам революциясы сақшылар корпусының қолбасшысы Мохаммад Пакпур және Қорғаныс кеңесінің хатшысы Али Шамхани бар.

Тегерандағы рәсімге мыңдаған адам жиналған. Қаралы киім киген тұрғындар ел астанасындағы орталық алаңдардың бірі – "Энгелаб" алаңына жиналып, қаза тапқан қолбасшыларды соңғы сапарға шығарып салуға келген.

Жерлеу рәсіміне қатысушылар қолдарына Иран туын және қаза тапқан әскери жетекшілердің портреттерін ұстап келген. Сонымен қатар алаң маңында АҚШ пен Израиль шабуылы салдарынан қаза тапқан Иранның бұрынғы жоғарғы көшбасшысы Али Хаменеи бейнеленген үлкен баннер орнатылған.

Алайда Али Хаменеи жерлеу рәсімі кейінге қалдырылған. Тегеран билігінің мәліметінше, бұл шешім жерлеу рәсіміне қажетті инфрақұрылымды дайындау қажеттілігіне байланысты қабылданған. Рәсімді кейінге шегеруге Иранға жасалып жатқан шабуылдардың әсері туралы ресми түрде айтылған жоқ.

Сонымен қатар кейбір адамдардың қолында Моджтаба Хаменеи – қаза тапқан көшбасшының ұлының суреттері байқалған. Ол 8 наурызға қараған түні жаңа көшбасшы ретінде таңдалғанымен, әзірге көпшілік алдына шықпаған.