Италиядағы орманды өртеу ісі бойынша тергеушілерге жантүршігерлік мәліметтер ашылды

Италияның оңтүстігіндегі орман өрттерінің себебін тергеп жатқан полицейлер сұмдық айғақ тапты: от қоюшылар өртті тарату үшін мысықтардың құйрығына "тез тұтанатын затқа малынған шүберектерді" байлап жіберген, деп хабарлайды Tengrinews.kz тілшісі CNN-ге сілтеме жасап.

Бұл туралы Калабрия азаматтық қорғау агенттігінің өкілі Доменико Костарелла Facebook-те жазды. Ол басқа да дәлелдердің қасақана өрт қоюға нұсқайтынын, оның ішінде тез тұтанатын шүберектер арасындағы жағылған шамдар мен отты баяу тұтату құрылғылары барын айтты.

Италиялық RAI телеарнасының мәліметінше, өрт сөндірушілер Калабриядағы Поллино ұлттық паркінің маңындағы өртпен күресті жалғастырып жатыр. Сәрсенбі күні RAI соңғы 24 сағат ішінде өрт сөндіру бөлімдері Калабрияда 160-тан астам операция жүргізгенін хабарлады.

Италияның жануарлар мен қоршаған ортаны қорғау қауымдастығы полицияға арыз түсіріп, мысықтарды өртегендер туралы ақпарат үшін 1000 еуро көлемінде сыйақы ұсынды.

CNN жазуынша, Италияның оңтүстігінде қасақана өрт қоюшылардың от тарату үшін мысықтарды пайдалануы бірінші рет емес. 2016 жылы Сицилия билігі мафияны ұлттық парктегі ормандарды өртеу үшін мысықтарды пайдаланды деп айыптады. Келесі жылы, шенеуніктердің айтуынша, дәл осындай тәсіл Неаполь маңындағы Везувийге жақын жерде қолданылған.

Берклидегі Калифорния университетінің зерттеушісі Лорен Пирсон өткен жылы CNN телеарнасына берген сұхбатында мафиялық топтардың аумақты бақылауға алу үшін ғимараттарды жиі өртейтініне, көбінесе өрттен кейін жерді төмендетілген бағамен сатып алатынына дәлелдер бар екенін айтты.

Пирсонның айтуынша, кейінгі жылдары кейбір ұйымдасқан қылмыстық топтар Италияның экологиялық таза энергияға көшуін өз мүддесіне пайдаланған; 2022 жылы мафияға қарсы комиссияға куәлік еткен бір фермер жері өртенгеннен кейін оған күн панельдерімен айналысатын компаниялар келіп, жерін сатуды ұсынғанын айтып берген.

Азаматтық белсенділер орман өрттерін тоқтату үшін өрт сөндірушілер емес, қоғамдағы өзгерістер қажет екенін айтады.

Google News арқылы жаңалықтарымызды қадағалаңыз