Ким Чен Ынның денсаулығы: қауесеттер мен шындық

Солтүстік Корея басшысы Ким Чен Ынның денсаулығы ауыр жағдайда екені туралы қауесет шетелдік БАҚ-та тез тарады. Әлеуметтік желілерде оның миына қан құйылып, комаға түскені және шұғыл түрде Қытайға жеткізілгені туралы ақпарат жарияланды. Алайда әзірге бұл мәліметтерді растайтын нақты дәлелдер жоқ.

20 қазанда британдық The Sun таблоиды интернетте тараған Ким Чен Ынның миына қатты қан құйылып, Солтүстік Корея медицинасының мүмкіндіктері шектеулі болғандықтан, оны шұғыл түрде Бейжіңге жеткізгені туралы мәлімдемелерді хабарлады. Басылымның өзі де бұл ақпаратты расталмаған қауесет ретінде сипаттады.

Оңтүстік Кореяның ChosunBiz басылымының мәліметінше, бұл оқиғаның бастапқы дереккөзі АҚШ-та тұратын қытайлық диссидент Се Ваньцзюнь болған. Ол 18 қазанда X әлеуметтік желісінде Бейжіңнен Солтүстік Кореяға ми қан тамырлары аурулары бойынша мамандар жіберілгенін, кейін Ким Чен Ынның Қытай астанасына жеткізілгенін жазған. Кейінірек ол тіпті Солтүстік Корея басшысының қайтыс болғанын мәлімдеген. Алайда автор медициналық құжаттарды, куәгерлердің айғақтарын немесе өзге де тексеруге болатын дәлелдерді ұсынбаған.

Осыдан кейін бұл ақпаратты бірқатар шетелдік басылымдар таратып, қауесет әлеуметтік желілерде жылдам тарап кетті.

Алайда 20 қазанда Солтүстік Кореяның мемлекеттік БАҚ-тары Ким Чен Ынның қатысуымен өткен жаңа қоғамдық іс-шара туралы хабарлады.

Кореяның орталық телеграф агенттігінің мәліметінше, 19 қазанда Ким Чен Ын 2026 жылғы Ұлттық киім және аяқкиім көрмесіне барған. Іс-шараға онымен бірге жұбайы Ли Соль Чжу мен қызы Ким Чжу Э де қатысқан. Жарияланған фотосуреттерде Солтүстік Корея басшысының киімдер мен аяқкиімдерді қарап, жанындағы шенеуніктермен әңгімелесіп, ұсынылған тауарларды зерттеп жүргені көрінеді. Оңтүстік Кореяның БАҚ-тары бұл кадрлардың жариялануын Пхеньянның Ким Чен Ынның денсаулығына қатысты тараған қауесеттерді сейілту әрекеті деп бағалады.

Сонымен қатар Солтүстік Кореяның мемлекеттік БАҚ-тары таратқан фотосуреттердің нақты қашан түсірілгенін тәуелсіз түрде растау қиын.

Ким Чен Ынның денсаулығына қатысты қауесеттер алғаш рет туындап отырған жоқ. Мәселен, 2020 жылы оның ұзақ уақыт бойы көпшілік алдына шықпауы ауыр науқасқа шалдыққаны, тіпті қайтыс болғаны туралы хабарлардың таралуына себеп болды. Алайда кейін бұл мәліметтер расталмады.

Бүгін, 12:38