Көкше теңіз жағасында Balkhash Tour Fest фестивалі өтеді

Фото: Қарағанды облысының әкімдігі

Балқаш өңірінің тартымдылығын арттыруға бағытталған фестиваль төртінші жыл қатарынан өткізіліп келеді. Өткен жылы іс-шараға 50 мыңнан астам адам қатысқан.

Биылғы жылдың басты жаңалығы – фестиваль алаңы жаз бойы жұмыс істейтін болады. Демалыс күндері мұнда концерттер, спорттық жарыстар мен түрлі ойын-сауық іс-шаралары ұйымдастырылады.

Бағдарлама аясында танымал әртістер Miras Zhugunussov, AYAU, Bellucci, Domino, Nurlan & Murat және Qazaq Band өнер көрсетеді. Сонымен қатар фестиваль аумағында шығармашылық және спорттық аймақтар, фудкорттар, қолөнершілер жәрмеңкесі, ашық аспан астындағы кинотеатр және отбасылық демалыс алаңдары жұмыс істейді.

Ұйымдастырушылардың айтуынша, мұнда жағажай волейболы, армрестлинг, регата және желкенді спорт бойынша шеберлік сабақтары өткізіледі.

«Кіреберісте қонақтарды интерактивті LED-арка қарсы алады. Бағдарламада сондай-ақ көбік су шашу кештері, жаркокросс, су такси, PikeMan жарыстары, жасанды интеллект және крафт ойындары бар. Экологияға және қалдықтарды өңдеуге ерекше назар аударамыз. Стритбаскетболдан, панна-футболдан және би батлынан турнирлер жалғасады. Олардың бірінің жеңімпазы көше билерінің халықаралық фестивалінде Қазақстанды таныстыру мүмкіндігіне ие болады», дейді Balkhash Tour Fest ұйымдастырушысы Ренат Алманов.

Еске сала кетейік, жаз маусымында Балқашқа қосымша пойыздар қатынайды. Сондай-ақ қалада реконструкциядан кейін қайта ашылған әуежай өз жұмысын бастады.