Көкшетауда психотроптық препараттарды сатумен айналысқан бойжеткен 7 жылға сотталды

АСТАНА, 9 тамыз - Sputnik. 23 жастағы Көкшетау тұрғыны күшті әсер ететін дәрілік препараттарды заңсыз сатқан, деп хабарлайды Ақмола облысының полиция департаменті.
2024 жылдың күзінен бастап қыз заңсыз айналымы қылмыстық жауапкершілікке әкеп соқтыратын дәрілік заттарды сатумен айналысқан.

"Ол дәрі-дәрмектерді интернет-ресурстар арқылы үлкен партиялармен сатып алып, таныстарына сатқан. Бұл тәуелділікті тудыратын және адам денсаулығына теріс әсер ететін дәрілер. Оларды тек дәріханаларда және дәрігердің рецепті бойынша ғана сатып алуға болады", - дейді полиция.

Полицейлер тұрғылықты жерін тінту барысында дәрі-дәрмектерді, сондай-ақ оны заңсыз өткізу мәселелері талқыланған әлеуетті сатып алушылармен хат-хабарларды тауып, тәркіледі.

"Бойжеткен бұрын электронды темекі сатумен айналысқан, бірақ кейіннен дәрі-дәрмектерді сатуға көшкен. Сонымен қатар, сот процесінде сотталушының өзі психобелсенді заттарды қолданатыны, психикалық және мінез-құлық бұзылыстары бар екендігі анықталды", - делінген хабарламада.

Сот әйелді кінәлі деп тауып, 7 жылға бас бостандығынан айырды. Ол жазасын орташа қауіпсіздік қылмыстық-атқару жүйесі мекемесінде өтейді. Сондай-ақ, сот емдеу түрінде медициналық сипаттағы мәжбүрлеу шараларын тағайындады.