Көкшетауда жылы аялдамалар жабық тұр

Көкшетауда жаңадан салынған жылы аялдамалардың жағдайы сын көтермейді. Іші суық, әрі лас. Кейбірі мүлде жабық. Тұрғындар редакциямызға осылай деп шағымданды. Ал жергілікті билік өкілдері не дейді? 

Көкшетауда былтыр жаңа 145 аялдама орнатылған. Оның 17-сі жылы павильон. Десе де оларға ешкім кіре қоймайды. Кейбірі электр тоғынан ажыратылып қабырғаларын қырау басқан. Бірі жабық тұрса, енді бірінің мүлде есігі жоқ.

Баян Мұқышова, қала тұрғыны:

- Көңілден шығып жатқан жоқ. Есігі жоқ. Іші суық. Міне, далада тұрмыз. 

Осылайша көкшетаулықтар жылы аялдамалардың игілігін көре алмай отыр.  Сақылдаған сары аязда қоғамдық көлікті далада тосуға мәжбүр.

Сағындық Күлияров, қала тұрғыны:

- Аялдамаларды жасап тастаған. Біз пайдаланбаймыз. Сыртында тұрмыз. Бала-шаға келеді, кәрілер келеді.

Жауаптылар мәселені жасырмайды. Медігер ұйыммен келісіп, жақын арада бәрін ретке келтіреміз деп отыр.

Ерболат Серікбаев, қалалық ТҮКШ бөлімінің басшысы:

- Мәселені шешу мақсатында мердігерлік ұйыммен осы аялдамалардағы электр сымдарын қайта қосу жұмыстары атқарылды. Қазіргі уақытта жаңа қыздыру қондырғыларын осы аптаның аяғына дейін орнататын боламыз. Сонымен қатар сынған шыныларды ауыстыру жұмыстары жүргізілуде.

Қаладағы аялдамалар жыл сайын жаңарып отырады. Павильондарға да қыруар қаражат жұмсалды. Былтыр әкімдік 300 млн теңге бөлді. Биыл екі жылы аялдама орнату көзделген. 

Авторлары: Абзал Азаматұлы, Евгений Шинкаренко