​КҚК терминалы арқылы қазақстандық мұнайды жөнелту уақытша кідірістерге ұшырады

Қазақстандағы ірі мұнай жобалары Каспий құбыр консорциумының (КҚК) теңіз терминалындағы ахуалға байланысты өндіріс көлемін азайтуға мәжбүр. Шикізатты жөнелту процесіне бір мезгілде дауылды ауа райы мен дрон шабуылдары қаупі әсер етуде, деп хабарлайды Reuters.

Нарық қатысушыларының айтуынша, қазіргі жөнелту рәсімі өте күрделі әрі ұзаққа созылып отыр. Бұрынғыдай ауа райына байланысты кідірістерге қоса жаңа қауіпсіздік хаттамалары енгізілген.

«Алдымен танкер ауа райын күтіп, айлаққа жақындайды. Содан кейін міндетті түрде сүңгуірлер тексеріс жүргізеді. Ал жүктеу басталғанда — дрон қаупі, дабыл... Осылай уақыт өтіп кетеді», — дейді трейдерлердің бірі агенттікке.

Өндіріске әсері 

Новороссийск портындағы қиындықтар Қазақстанның ең ірі кен орнына да әсер етті. Reuters дерегінше, 1 наурыздағы жағдай бойынша Теңіздегі тәуліктік өндіріс 415 мың баррельге дейін төмендеді. Ақпан айында орташа көрсеткіш тәулігіне 590 мың баррель болған. Яғни, өндіріс шамамен 30 пайызға азайды.

«Теңізшевройл» компаниясы журналистердің сұрағына қысқа жауап берді: «Компания жағдайға қарай өндіріс көлемін кезең-кезеңімен арттырып жатыр».

Болжамдар 

Новороссийск аймағындағы ауа райы болжамы әлі де қолайсыз. Жиі болатын дауылдар айлақ құрылғыларын сүңгуірлердің міндетті тексеруіне мүмкіндік бермей отыр. Бұл тексеріссіз мұнайды танкерлерге тиеуге қауіпсіздік талаптары бойынша рұқсат жоқ.

Бүгін, 11:47