КТК теңіз терминалына дрондар арқылы шабуыл жасалды

Фото: КТК, телеграм

КТК мәліметінше, 19 шілде күні қалқымалы тиеу құрылғылары – ВПУ-1 және ВПУ-3 арқылы мұнай тиеу жұмыстары кезінде ASIA және NISSOS IOS атты екі мұнай танкеріне ұшқышсыз ұшу аппараттарын пайдалану арқылы мақсатты террористік шабуыл жасалды.

«ASIA танкері «Теңізшевройл» («Chevron») компаниясының мұнайын, ал NISSOS IOS танкері Kashagan B.V. мен «Матен» АҚ (ҰК «ҚазМұнайГаз» АҚ) компанияларының мұнайын тиеп жатқан.

Либерия (ASIA) және Маршалл аралдары (NISSOS IOS) туларымен жүзетін танкерлерде халықаралық экипаж мүшелері болған. Шабуыл салдарынан ASIA танкерінде өрт шығып, ол КТК-ның апаттық әрекет ету қызметтерінің көмегімен сөндірілді», делінген хабарламада.

КТК терминалына жасалған шабуылды қолдағандардың үстінен іс қозғалды

Шабуылдан кейін мұнай тиеу жұмыстары тоқтатылды. Баспасөз қызметінің мәліметінше, КТК қызметкерлері мен мердігер ұйымдардың арасында зардап шеккендер немесе қаза тапқандар жоқ. Мұнайдың теңізге төгілуіне жол берілмеген. Экипаж мүшелері медициналық көмекке жүгінбеген. Танкерлердің жүзу қабілеті сақталған, қазіргі уақытта келтірілген залалдың көлемі бағаланып жатыр.

«Каспий құбыр консорциумы Ресей, АҚШ, Қазақстан және Батыс Еуропаның бірқатар елдерінің отын-энергетика саласындағы ірі кәсіпорындарын біріктіреді. Компания нысаны мен КТК теңіз терминалы акваториясындағы азаматтық кемелерге жасалған шабуылды біз КТК-ға қатысушы мемлекеттердің мүдделеріне жасалған шабуыл деп санаймыз. Бұл – халықаралық құқық қорғауындағы азаматтық нысанға қарсы жасалған 5-інші тікелей агрессия әрекеті», деп мәлімдеді КТК.

Энергетика министрлігі: КТК маңындағы дрон шабуылы қазақстандық мұнайға қауіп төндірмейді

Мәлімдемеде КТК акционерлері мен оған қатысушы мемлекеттердің басшылығы консорциумның жаһандық энергетикалық қауіпсіздікті қамтамасыз етудегі және қатысушы елдердің экономикалық мүдделерін іске асырудағы маңызды рөлін мойындайтыны атап өтілген.