Ломбардтағы микронесие енді несие тарихына кері әсер етпеуі мүмкін

Қазақстанның Қаржы нарығын реттеу және дамыту агенттігі несие бюросының қызметін реттейтін қаулы жобасын жариялады, – деп хабарлайды Aikyn.kz сайты.

Құжатта қарыз алушыларға, банктерге және бизнеске қатысты бірқатар өзгеріс, сондай-ақ банк қызметтерін цифрландыру шаралары қарастырылған.

Басты жаңалықтардың бірі – ломбард арқылы рәсімделген микронесиелердің несие тарихына әсер ету тәртібін өзгерту. Жобаға сәйкес, кепілге мүлік қойып алынған мұндай несиелер бойынша мерзімі өткен берешек, айыппұл және өсімпұл туралы мәліметтер енді несие есебінде көрсетілмейді.

ҚНРДА мұны ломбард қызметінің ерекшелігімен түсіндірді. Өйткені мұндай қарыздар толықтай кепілмен қамтамасыз етіледі. Егер клиент несиені өтемесе, ломбард кепілге қойылған мүлікті өзінде қалдырады және қарыз алушыдан қосымша төлем талап ете алмайды.

Қазіргі тәртіп бойынша мұндай кешіктірулер азаматтардың несие тарихына теріс әсер етіп, ипотека немесе автонесие сияқты басқа да қарыздарды рәсімдеуге кедергі келтіруі мүмкін. Енді бұл тәсілді өзгерту ұсынылып отыр.