Өрмекші адам: Жаңа күн рекорд орнатып, әлемдік кинопрокат тарихына енді

"Өрмекші адам: Жаңа күн" әлемдік кинопрокат тарихына енді. Фильм үш апта ішінде 2 миллиард долларлық межені бағындырып, мұндай нәтижеге ең жылдам қол жеткізген екінші жоба атанды, деп хабарлайды Tengri Life.

Питер Паркер туралы хикаяның жаңа бөлімі небәрі үш аптада әлемдік кассада 2 миллиард доллардан астам қаражат жинады. Бұдан жылдам нәтижені тек 2019 жылы шыққан "Кек алушылар: Финал" фильмі көрсеткен болатын.

Variety басылымының мәліметінше, үшінші аптада "Өрмекші адам: Жаңа күн" Солтүстік Америкада шамамен 70 миллион доллар табыс тауып, жергілікті прокатта көш бастап тұр. Қазіргі таңда туындының жалпы кассасы шамамен 2,02 миллиард долларды (шамамен 926,1 миллиард теңге) құрады.

Instagram-дағы бұл жазбаны көру

A post shared by Variety (@variety)

"Өрмекші адамның" жаңа рекорды

Variety басылымының мәліметінше, жаңа туындының сәттілігі оған 2 миллиард долларлық межені еңсерген сирек фильмдер тізіміне кіруге мүмкіндік берді. Соңғы мәліметтер бойынша, бұл тізімге мына туындылар да енген:

"Аватар" (2009) - 2,9 миллиард доллар; "Аватар: Су жолы" (2022) - 2,3 миллиард доллар; "Титаник" (1997) - 2,2 миллиард доллар; "Жұлдызды соғыстар: Күштің оянуы" (2015) - 2,07 миллиард доллар; "Кек алушылар: Шексіздік соғысы" (2018) - 2,03 миллиард доллар; "Кек алушылар: Финал" (2019) - 2,79 миллиард доллар; "Өрмекші-адам: Жаңа күн" (2026) - 2,022 миллиард доллар.

Сонымен қатар жаңа фильм 1,9 миллиард доллар жинаған "Өрмекші-адам: Үйге жол жоқ" туындысын, сондай-ақ әрқайсысы шамамен 1,3 миллиард доллар тапқан "Дэдпул мен Росомаха" және "Қара пантера" фильмдерін артқа тастап, ең табысты жеке суперқаһармандық фильм атанды.

Фильм туралы не белгілі?

Жаңа фильм "Өрмекші адам: Үйге жол жоқ" туындысынан кейінгі оқиғаларды жалғастырады. Алдыңғы бөлімнің соңында Доктор Стрэндж бүкіл әлемге Питер Паркердің кім екенін ұмыттыратын дуа қолданған болатын. Енді кейіпкер жалғыздықта өмір сүріп, толығымен қылмыспен күресуге көшкен.

Жоба анонсына сәйкес, ол бұрынғы достарының қалай өмір сүріп жатқанын сырттай бақылауға мәжбүр. Сонымен бірге Питер авторлар аса қауіпті деп сипаттаған жаңа қатермен бетпе-бет келеді.

Актерлік құрам

Басты рөлді тағы да Том Холланд сомдады.

Зендея Эм-Джей рөліне қайта оралады; Джейкоб Баталон қайтадан Недтің рөлін ойнайды; Сэди Синк – "Оғаш оқиғалар" (Stranger Things) жұлдызы актерлік құрамдағы басты жаңа есімдердің бірі болмақ.

Сондай-ақ жобаға Джон Бернтал қосылды, ол тағы да Жазалаушы – Фрэнк Касл рөлін сомдайды.

Жаңа бөлімнің режиссері - бұған дейін Marvel киноәлемінде басты рөлде Симу Лю ойнаған "Шан-Чи және он сақина аңызы" (2021) фильмімен дебют жасаған Дестин Дэниел Креттон.

Google News арқылы жаңалықтарымызды қадағалаңыз

Жазылу