Мәдениет елшісі . Димаш Құдайберген жанкүйерлерін тағы да таңғалдырды

Әнші Димаш Құдайберген өзінің шығармашылық жолындағы ең маңызды оқиғалардың бірі - Нью-Йорктегі Madison Square Garden аренасында өткен жеке концертіне арналған Before the Applause ("Шапалаққа дейін") деректі фильмінің шығатынын хабарлады, деп хабарлайды Tengri Life.

Әнші Димаш Құдайберген өзінің шығармашылық жолындағы ең маңызды оқиғалардың бірі - Нью-Йорктегі Madison Square Garden аренасында өткен жеке концертіне арналған Before the Applause ("Шапалаққа дейін") деректі фильмінің шығатынын хабарлады, деп хабарлайды Tengri Life.

Before the Applause туындысы жаңа концерттік тур қарсаңында жарық көреді. Картина тизерінде 2025 жылдың 5 қазанында өткен концертке дайындық барысы баяндалады: Димаш Madison Square Garden сахнасында Stranger шоуын ұсынып, әлемдегі ең танымал концерттік алаңдардың бірінде өнер көрсеткен алғашқы қазақстандық әртіс атанды.

Мәліметтерге сүйенсек, фильмде көрермендер орындаушының өзінің, сондай-ақ оның командасы мен отбасының естеліктерін тамашалай алады. Жоба авторлары концерттің өзін ғана емес, осы айтулы оқиғаға дейінгі көпжылдық еңбек жолының тарихын көрсетуге уәде беріп отыр.

Еске сала кетсек, әртістің өзі концерт алдында алдағы іс-шараның маңызы мен аңызға айналған сахнаға шығар алдындағы жауапкершілік туралы айтқан болатын.

"Бұл үлкен жауапкершілік, бірақ ол мені қорқытпайды, керісінше, алға ұмтылуға шабыттандырады. Сонымен қатар біз мәдениет елшісі рөлін атқарып отырмыз - осындай аңызға айналған сахнада басқа құрлықтағы адамдардың жүрегін жаулап алудың бірегей мүмкіндігіне бірінші болып ие болдық", - деп атап өтті Димаш концерт қарсаңында Tmrw Magazine журналына берген сұхбатында.

Madison Square Garden-дегі концерт Stranger әлемдік турының бастауы болып, әлемнің түкпір-түкпірінен келген көрермендер залға лық толды.

"Madison Square Garden-дегі өнер көрсету әртістің шығармашылық жолындағы маңызды кезеңге айналды және көпжылдық жұмыстың, кәсіби өсу мен үлкен арманның орындалуының көрінісі болды", - деп атап өтті фильм авторлары.

Бағдарламаға бұрыннан танымал композициялар да, жаңа туындылар да енді. Әртіс Қазақстан әнұраның орындап, "Самғау" атты авторлық әнін паш етті, сондай-ақ оның авторы, "Грэмми" сыйлығының екі дүркін иегері Уолтер Афанасьевтің сүйемелдеуімен Love’s Not Over Yet туындысын шырқады.

Деректі фильм жанкүйерлер мен көрермендерге ауқымды шоу алдындағы оқиғаларды көруге, сондай-ақ әртістің мансабындағы ең елеулі өнер көрсетулерінің біріне дейінгі жолда оған серік болған адамдар туралы көбірек білуге мүмкіндік береді деп күтіледі.

Google News арқылы жаңалықтарымызды қадағалаңыз