​Мәдениет және ақпарат министрі журналист Азамат Омаровтың ұсталуына қатысты пікір білдірді

Вице-премьер, Мәдениет және ақпарат министрі Аида Балаева «Ахуал сегодня» YouTube-арнасының журналисі Азамат Омаровтың ұсталуына байланысты мәлімдеме жасап, БАҚ өкілдеріне үндеу жасады, деп хабарлайды Malim.kz.

Министр әлеуметтік желіде тарап жатқан «журналист шенеуніктерді әжуалағаны үшін ұсталды» деген ақпаратты теріске шығарды. Оның айтуынша, елімізде сөз бостандығына кепілдік берілген, цензураға тыйым салынған, ал сатира мен әзіл үшін заңда жауапкершілік көзделмеген.

Аида Балаева журналистің Қылмыстық кодекстің 174-бабы, яғни әлеуметтік, ұлттық немесе діни алауыздықты қоздыру бабы бойынша ұсталғанын нақтылады. Контентте алауыздық қоздыру белгілері болса, ол әзіл түрінде ұсынылса да заң алдында жауапкершілік жүктеледі. «Заң және тәртіп» қағидаты баршаға бірдей.

Осыған байланысты министр құқық қорғаушыларды Мәдениет және ақпарат министрлігімен бірлесе отырып, журналистер мен контент авторларына алауыздықты қоздыру мен жалған ақпарат таратудың заңдық салдарын түсіндіру жұмыстарын күшейтуге шақырды.

Кеше, 17:55