Маңғыстау облысында қонақ үй және спорт нысандары ашылды

Маңғыстау облысында қонақүй кешені мен спорт нысандары қолданысқа берілді.

Көпсалалы демалыс нысаны Каспий жағалауында бой көтерсе, ангар түріндегі жабық спортзалдар Мұнайшы және Жетібай ауылында ашылды. Жаңа ғимараттардың құрылысына инвестор қаражаты жұмсалды.

Қонақ үй кешені Мемлекет басшысының туризм мен өңірлік инфрақұрылымды дамыту жөніндегі тапсырмасы аясында салынды. Көпсалалы нысан 350 балаға жазғы лагерь, қалған уақытта туристік демалыс орталығы ретінде қызмет көрсетеді. Бассейн, кинозал, спорт алаңдары мен мейрамханасы бар. Жаз мезгілінде 100-ден астам адам жұмысқа алынады.

Абат Өрісбаев, облыс әкімінің орынбасары:

- Маңғыстау облысының білім басқармасымен бірлесе отырып біздегі туризм колледжі, педагоикалық колледж, басқаларымен бірігіп осыған мамандарды дайындап жатырмыз. Алдағы уақытта келетін балаларға сапалы қызмет жасайтын біздің мамандарымыз сәйкес болуы керек. Мемлекет басшысының қолдауымен және өңір басшысы Нұрдәулет Игілікұлының тікелей қолдауымен іске асып жатқан жобалардың бірі.

Қарақия ауданында қос бірдей спорт нысаны ашылды. Салтанатты шарада облыс әкімі Нұрдәулет Қилыбай тұрғындарды салауатты өмір салтын ұстануға үндеді. Озық үлгідегі спортзалдардың әрбірі  футбол, волейбол, күрес, баскетбол үйірмесіне 50 адамды қабылдайды.

Жаңылхан Төребекқызы, Мұнайшы ауылының тұрғыны:

- Осы балаларымыз үшін ашылып жатқан нысандар бізге өте қажет. Өте қуаныштымыз, рахмет. Бұрын бізде осындай нысандар болған жоқ.

Ерғали Жақсылықов, Мұнайшы ауылының тұрғыны:

- Ұлттық намысын оятып, рухын көтеріп қазақты әлемге танытатын саланың біреуі - спорт. Осы кешенде біздің ұрпақтарымыз жақсы нәтижеге жетеді деп есептейміз. Қаражатын тауып, осының іске асуына қолғабыс еткен ел азаматтарына көп рахметімізді айтамыз.

Биыл Жетібай ауылында алғаш рет балалар мен жасөспірімдерге арналған спорт мектебі тұрғызылды. Зәулім спортзалдар келешекте осы мемлекеттік мекеменің қарамағына өтеді.

Авторлары: Талғат Исламұлы, Саламат Бекбаев