Маңғыстаудағы Боранбаевтың мұнай кен орны ресми түрде ҚМГ ға берілді

Бұған дейін кәсіпкер Қайрат Боранбаевқа тиесілі болған «Phystech II» бұрынғы мұнай компаниясы ресми түрде «ҚазМұнайГаз» ұлттық компаниясының бақылауына өтті, деп хабарлайды Petrocouncil.kz.

Акционерлер құрамының өзгергені туралы ақпарат Қаржылық есептілік депозитарийінің сайтында пайда болды. Ресми мәліметтерге сәйкес, мәміле 2026 жылғы 29 мамырда ресімделген.

«Phystech II» АҚ — Маңғыстау облысындағы Солтүстік Қаражанбас кен орнында көмірсутектерді барлау және өндіру құқығына иелік ететін ірі мұнай өндіруші актив.

Бұл актив туралы не белгілі? Компания мемлекет меншігіне 2023 жылдың қазан айында Қайрат Боранбаевтың активтерді ерікті түрде қайтаруы аясында өткен болатын. Сол кезде үкімет кәсіпорынды 35 миллиард теңгеге бағалаған еді.

Бастапқыда «Phystech II» «Самұрық-Қазына» қорының басқаруына берілді. Кейін үкімет кулуарында компанияны жеке инвесторға қайта сату нұсқасы талқыланды. Алайда, қорытындысында билік стратегиялық активті мемлекеттік құрылымда қалдыру және оны бейінді еншілес ұйым — «ҚазМұнайГазға» беру туралы шешім қабылдады.

Бүгін, 10:55