Мәжіліс депутаты: Әйелдің қазіргі қоғамдағы рөлі ерлікпен пара пар

«Біз ұлы жетістіктер мен ауыр қылмыстар туралы қарама-қайшы ақпарат күн сайын қатар жетіп отыратын заманда өмір сүріп жатырмыз. Ал осының барлығының түп-тамыры – адамда. Ал адам ең алдымен отбасынан бастау алады. Дәл осы жерде әйел шешуші рөл атқарады. Ол алғашқы құндылықтарды қалыптастырып, бүкіл өмірге бағыт береді», – деді Олжас Құспеков.

Депутат бүгінгі қоғамда әйелге орынсыз пікірлер жиі таңылатынын атап өтті.

«Кей жерлерде әйелге тоқал болу немесе біреудің отбасын бұзушы рөлін ұсыну сынды модельдер насихатталады. Бірақ басқа жол да бар – ол әйелдің ана, көшбасшы, даналық пен үйлесімділіктің иесі ретіндегі жолы», – деді ол.

Олжас Құспеков мысал ретінде өткен ғасырдағы Жапонияны келтірді. Ол елде қыздарға жоғары білімсіз тұрмысқа шығуға тыйым салатын ереже болған. Оның айтуынша, дәл осы норма әйелге деген құрмет пен білімге басымдық беретін болашақ қоғамның іргетасын қалады.

«Ата-бабамыз “Әйел бір қолымен бесікті, бір қолымен әлемді тербетеді” деген. Яғни, аналарымыз бесікті ғана емес, бүкіл ұлтты тербетеді. Бұл “отқа түсіп, ерлік жасау” жайлы емес, қазақ әйелінің шынайы миссиясы тепе-теңдікті сақтау, рух беру және болашақ ұрпақты қалыптастыру дегенді білдіреді», – деп атап өтті спикер.

Депутат партия жанындағы Re.Women қозғалысы жай ғана қауымдастық емес, әйелдің қоғамдағы рөлін қайта пайымдап, оған мән беріп, құрмет көрсетіп, үнін тыңдауды мақсат еткен қоғамдық қозғалыстың бастауы екенін айтты.

«Оның мақсаты — әйелдердің көшбасшылық әлеуетін дамыту, білім беруді қолдау және қазақстандық әйелдің жаңа моделін қалыптастыру. Жоба кәсіпкер әйелдерді, қоғам қайраткерлерін, сарапшыларды және теңдік, даму мен мәдени сабақтастық құндылықтарын бөлісетін ер азаматтарды біріктіреді», - деп түсіндірді депутат.

Айта кетейік, Атырау облысында ауыл әйелдерінің аймақтық форумы өтті.