Мектептің бас есепшісі 52 млн теңге жымқырған

Қызылорда облысына қарасты Байқоңыр қаласының прокуратурасы мемлекет бюджетін жымқыру фактісін анықтаған. Жемқорлық әрекеті білім беру ұйымдарының 2022-2024 жылдары аралығында бюджет қаражатының жұмсалу заңдылығына жүргізілген талдау нәтижесінде белгілі болған, деп хабарлайды Egemen.kz.

Фото: istockphoto.com

Прокуратураның мәліметінше, орта білім беру ұйымының бас есепшісі бірнеше мұғалімнің есеп шотына артық жалақы аударып, кейін аударылған қаржыны өзінің жеке есепшотына жіберіп отырған. Салдарынан мемлекеттік бюджетке 52 млн теңге залал келтірілген.

Факті бойынша сотқа дейінгі тергеп-тексеру жүргізіліп, іс сотқа жолданды. Сот үкімімен мектептің бас есепшісі кінәлі деп танылып, 7 жыл бас бостандығынан айыру жазасы тағайындалды.

Кәмелетке толмаған балаларының болуына байланысты Қылмыстық кодекстің 74-бабына сәйкес жаза өтеу мерзімі 5 жылға кейінге қалдырылды.