Мелони Украинаға қатысты Париж бен Берлиннің бастамаларына күмәнмен қарайды БАҚ

АСТАНА, 7 маусым – Sputnik. Италия премьер-министрі Джорджа Мелони Украина мәселесіне қатысты Париж бен Берлиннің бастамаларына күмәнмен қарайды, деп жазды La Repubblica газеті үкіметтегі дереккөзге сілтеме жасап.

Франция президенті Эммануэль Макрон, Германия канцлері Фридрих Мерц, Ұлыбритания премьер-министрі Кир Стармер және Украина басшысы Владимир Зеленский 7 маусым күні Лондонда кездесіп, Ресеймен ықтимал келіссөзді талқылауды жоспарлап отыр.

Газеттің мәліметінше, Италия билігі АҚШ-тың қатысуынсыз қандай да бір келісімге қол жеткізу мүмкін емес деп санайды. Сонымен қатар Рим Украинаға "батыстық коалиция" құрамында әскер жіберу мәселесінде сақтық танытып отыр және Киевтің Еуропалық Одаққа жедел қабылдануын басты басымдық деп есептемейді.

"Үкіметтің ұстанымы бойынша Украинаны қолдайтын коалиция әзірге нақты нәтижеге қол жеткізе алмай отыр. Әскер жіберу туралы әңгіме үш жылдан астам уақыт бойы айтылып келеді", - деп басылым дереккөздің сөзінен үзінді келтірді.

Бейсенбі күні Зеленский өзінің ресми сайтында хат жариялап, онда Ресей президенті Владимир Путинмен үшінші ел аумағында кездесу өткізуді ұсынған. Ресей президентінің баспасөз хатшысы Дмитрий Песков Зеленскийдің "ашық хатының" жазбаша нұсқасы Путинге жеткізілгенін және Ресей президентінің онымен танысқанын мәлімдеді.

Бейсенбі күні Ресей президенті Санкт-Петербург халықаралық экономикалық форумы аясында халықаралық ақпарат агенттіктерінің басшыларымен кездесуде Ресейдің Украинадағы қақтығысты аяқтауға ниетті екенін, алайда Киевтің әзірге бейбіт келісімдер жасауға дайын емес екенін атап өтті.