Министрлік Грузияға баратын қазақстандықтарға ескерту жасады

АСТАНА, 16 қыркүйек – Sputnik. Сыртқы істер министрлігі Грузия баратын қазақстандықтарға ескерту жасады, деп хабарлайды Sputnik Қазақстан.

Осы айдан бастап Грузияда заңсыз жұмыс істейтін шетелдіктерді елден шығарып жіберу шарасы қолданыла бастады. Бүгінде Қазақстан азаматтары осы елде бір жыл бойы визасыз жүре алады.

"Алайда бұл визасыз режим еңбек қызметін жүзеге асыруға құқық бермейтінін ескеру керек. Бұдан бөлек, тиісті рұқсатсыз ақылы еңбек қызметін жүзеге асыру әкімшілік жауапкершілікке әкеліп соғады. Шетел азаматы елден шығарылған жағдайда оған Грузия аумағына қайта кіруге 2 жылдан 5 жылға дейінгі тыйым салынуы мүмкін", - дейді министрліктің ресми өкілі Жанболат Үсенов.

Осыған байланысты Грузияда жұмысқа орналасуды, кәсіпкерлікпен немесе өзге де ақылы қызметпен айналысуды жоспарлап отырған қазақстандықтарға заң талаптарын алдын ала нақтылап алған жөн.