Министрлік тапсырыспен ғылыми мақала жазу қызметіне қатысты пікір білдірді

Фото: istockphoto.com

NewTimes.kz сайтының мәлімдеуінше, министрлік диссертациялық зерттеу нәтижелерін Scopus және Web of Science дерекқорларына енгізілген халықаралық рецензияланатын ғылыми журналдарда жариялау – әлемдік ғылыми тәжірибеде қалыптасқан талап екенін еске салды. Сонымен қатар журналды таңдау оның ғылыми бағытына, беделіне, баспасына, редакциялық алқасының құрамына және индекстелу тарихына қарай саналы түрде жасалуы қажет.

«Жас зерттеушілер мақала жолдамас бұрын журнал туралы ақпаратты өздері тексеріп, «жариялауға кепілдік береміз» деген анонимді жарнамаларға сенбеуі керек», делінген министрліктің хабарламасында.

Ведомство ғылыми мақаланы сатып алу зерттеушіге көмек болып саналмайтынын да мәлімдеді.

«Тапсырыспен жазылған ғылыми мақалалар – көмек емес, академиялық этиканы бұзу. Ғылыми мақала жарияланым талабын формалды орындау үшін сатып алынбауы, автордың өз зерттеуінің нәтижесін көрсетуі тиіс. Сондықтан зерттеушілер мұндай ұсыныстарға мүлде төзбеуі қажет», деп мәлімдеді министрлік.

Қазақстан Horizon Europe ғылыми бағдарламасына қосылуды жоспарлап отыр

Министрлік Scopus журналдарында жариялану міндетті түрде ақылы болады деген пікірге де түсінік берді. Ведомствоның мәліметінше, жарияланым құны журналдың жұмыс моделіне байланысты.

Мысалы, ашық қолжетімділік (Open Access) журналдарында мақаланы барлық оқырман еркін пайдалана алуы үшін жариялау ақысын автор төлейді. Ал жабық қолжетімділік журналдарында шығынды жазылушылар өтейтіндіктен, автор үшін жарияланым тегін болуы мүмкін.

SCImago рейтингі: Қазақстан Орталық Азиядағы ғылыми көшбасшыға айналды

Министрліктің түсініктеме беруіне ғылыми жұмыстарды «кілтпен» жазып беру туралы хабарландырулар төңірегіндегі қоғамдық пікірталас себеп болған.

Отандық зерттеуші Амина Амутова физика саласы бойынша ғылыми жұмыс жазып беруді ұсынған жарнама авторының өзінің ғылыми жарияланымдары жоқ екенін және PhD диссертациясын әлі қорғамағанын айтты. Соған қарамастан, оның байқауынша, мұндай қызметтер ғылыми дәреже ізденушілері арасында зор сұранысқа ие.

Бұған дейін Оқу-ағарту министрі БЖБ мен ТЖБ-ны алып тастау мәселесіне қатысты мәлімдеме жасағанын хабарлаған едік.