Мұнай бағасы тағы қымбаттады

Әлемдік нарықта мұнай бағасы айтарлықтай өсті. Сарапшылар мұны Израиль мен Иран арасындағы жағдайдың ушығуымен байланыстырып отыр.

8 маусымдағы сауда-саттық барысында Brent маркалы мұнайдың тамыз айына арналған фьючерстері алдыңғы жабылу бағасымен салыстырғанда 3,6 пайызға қымбаттап, бір баррелі 96,7 долларға дейін көтерілді.

Сондай-ақ WTI маркалы америкалық мұнайдың бағасы 93,5 долларға жетсе, Urals маркалы мұнайдың бір баррелі шамамен 86,3 доллар деңгейінде саудалануда.

Нарықтағы өсімге Таяу Шығыстағы геосаяси тәуекелдердің күшеюі және Парсы шығанағы арқылы мұнай мен газ жеткізіліміне қатысты алаңдаушылық әсер етіп отыр.

Сарапшылардың мәліметінше, АҚШ, Израиль және Иран арасындағы шиеленіс жалғасқан 100 күн ішінде әлемдік сауда үшін маңызды саналатын Ормуз бұғазы арқылы шамамен мың кеме өткен. Бұл қалыпты жағдайда бір апта ішінде өтетін кемелер санына тең.

7 маусым күні кешке Иран Израильдің солтүстік өңірлеріне зымыран шабуылын жасаған. The Times of Israel мәліметінше, бұл сәуір айынан бері тіркелген алғашқы осындай шабуыл. Ал Тегеран бұл әрекетін Израильдің Ливандағы операцияларына жауап ретінде түсіндірген.

Сарапшылардың пікірінше, егер өңірдегі жағдай одан әрі күрделене түссе, мұнай бағасы алдағы уақытта да жоғары деңгейде сақталуы мүмкін.