​Мұнайдың бағасы 100 доллар: АҚШ Ресей шикізатын сатып алуға уақытша рұқсат берді

АҚШ Қаржы министрлігі Ресей мұнайын теңіз арқылы жеткізуге қатысты уақытша жеңілдік енгізді. Мемлекеттерге қазірдің өзінде жолда келе жатқан шикізатты сатып алу үшін 30 күндік лицензия берілді. Ведомство басшысы Скотт Бессент бұл жағдайға қатысты пікір білдірді, деп хабарлайды Reuters.

Бессенттің айтуынша, бұл — Иран төңірегіндегі қақтығысқа байланысты қысымға ұшыраған әлемдік энергетикалық нарықтарды тұрақтандыру үшін қажетті «тар шеңбердегі және қысқа мерзімді шара». Министр бұл қадамның жанармай бағасын төмен ұстап тұруға бағытталғанын және Мәскеуге айтарлықтай пайда әкелмейтінін атап өтті, өйткені бұл тек танкерлерге тиеліп қойған партияларға ғана қатысты.

Бұл шара неге қазір қолданылып жатыр?

Себебі әлемдік нарықтағы ахуал тұрақсыз:

Мұнай бағасы соңғы төрт жылда алғаш рет қайтадан барреліне 100 долларлық межеден асты.30-дан астам ел өздерінің стратегиялық резервтерін ашып, нарыққа 172 миллион баррель шығарғанын жариялады, бірақ бұл бағаның өсуін тоқтата алмады.Иранның Парсы шығанағынан жеткізілімдерді бұғаттау туралы қоқан-лоққысы жаһандық тапшылық қаупін тудырып отыр.

Мерзімдері мен шарттары

АҚШ Қаржы министрлігінің сайтында жарияланған құжатқа сәйкес, лицензия 12 наурыздан бастап кемелерге тиелген мұнай мен мұнай өнімдерін сатуға рұқсат береді. Бұл мүмкіндік Вашингтон уақытымен 11 сәуір түнгі сағат 00:00-де жабылады.

Бұған дейін Үндістан да теңізде «тұрып қалған» жүктерді алып кету үшін осындай 30 күндік мерзім алған болатын. Сарапшылар АҚШ әкімшілігі Тегеранмен текетірес жалғасып жатқанда, ел ішінде және әлемде отын дағдарысына жол бермеу үшін осындай қадамдарға барып жатқанын айтады.

Бүгін, 10:15