Нөмірін жасырып қойған: астаналық азамат тұрақ ақысын төлеуден жалтарған

Астана қаласында полицейлер патрульдеу кезінде көлік жүргізушісінің мемлекеттік тіркеу нөмірін әдейі жасыру фактісін анықтады, – деп хабарлайды Aikyn.kz сайты.

Тексеру барысында 21 жастағы жүргізуші  ақылы автотұраққа көлігін қойып, артынан төлемнен жалтару мақсатында нөмірдің бір бөлігін жауып қойған. Тұрақ аумағынан шыққан соң да ол жапқышты шешпей, қозғалысын жалғастырған. Бұл әрекетті полиция қызметкерлері дер кезінде байқап, жүргізушіні тоқтатты.

Аталған құқықбұзушылық бойынша ҚР ӘҚБтК-нің 590-бабы 4-бөлігіне сәйкес әкімшілік хаттама толтырылды. Сот шешімімен азамат бір жыл мерзімге көлік басқару құқығынан айырылып, әкімшілік қамауға алынды.

Полиция азаматтарға жол қозғалысы ережелерін қатаң сақтауды және мемлекеттік нөмірлік белгілерді әдейі жасыру – заңмен белгіленген жауапкершілікке әкелетінін ескертеді.