Олжас Бектенов Чехия Премьер министрімен кездесті

О. Бектенов кездесу барысында Қазақстан мен Чехия арасында қарым-қатынас дамып келе жатқанын, бұл ел Еуропа одағындағы маңызды әрі сенімді серіктестердің бірі екенін айтты. Осы орайда Чехия Премьер-министрінің Қазақстанға сапары ынтымақтастық пен іскерлік байланыстарды нығайтуға қызығушылықтың артып келе жатқанын көрсетеді.

Фото: Виктор Федюнин/Kazinform

Сонымен қатар, ҚР Үкімет басшысы бүгін елордадағы Қазақстан-Чехия бизнес форумы тікелей байланыстарды нығайтуға серпін беретінін сөз етті. 

Фото: Виктор Федюнин/ Kazinform

Олжас Бектеновтің сөзіне қарағанда, Чехия Қазақстанның Еуропадағы маңызды сауда және экономикалық серіктестерінің бірі. Бұл ретте тауар айналымы көлемі артып келеді. 

Мұнымен қоса Премьер-министр елімізде чех капиталының қатысуымен 150-ге жуық компания бар екенін айтты. 

Фото: Виктор Федюнин/Kazinform

Үкімет басшысы Чехия кәсіпкерлерінің Қазақстанға инвестиция салуын құптайтынын және оңтайлы инвестициялық ахуалды қамтамасыз етуде жан-жақты қолдау жасалатынын атап өтті. 

— Бұл шаралар елімізде жүргізіліп жатқан кешенді әлеуметтік-экономикалық реформаларымызға сәйкес келеді. Жалпы, Қазақстан Үкіметі Чехиямен қарым-қатынасты одан әрі дамытуға мүдделі және экономиканың басым салаларында жаңа бірлескен жобаларды жүзеге асыруға дайын, — деді Олжас Бектенов.

Фото: Виктор Федюнин/Kazinform

Айта кетейік, бұған дейін Қазақстан мен Чехия арасында өнеркәсіптік ынтымақтастық нығая түсетінін жазған едік.