Өңірлерге арзан сиыр еті жеткізілмек

Министрдің айтуынша, әлеуметтік маңызы бар азық-түлік тауарларының бағасын тұрақтандыру үшін мемлекет бірқатар шара қабылдап жатыр

Елімізде өңірлерге арзан сиыр еті жеткізілетін болады. Бұл туралы Сауда және интеграция министрі Арман Шаққалиев айтты.

Министрдің айтуынша, әлеуметтік маңызы бар азық-түлік тауарларының бағасын тұрақтандыру үшін мемлекет бірқатар шара қабылдап жатыр. Отандық тауар өндірушілерден өнім сатып алу көлемі екі есеге ұлғаяды. Сондай-ақ бағаны негізсіз өсіріп келген делдалдар анықталып, оларды сауда саласынан шеттету жұмыстары жүргізілуде.

Шаққалиевтің сөзінше, әлеуметтік тауарлар бағасын ұстап тұруға бөлінетін қаржы көлемі де артады. Бұл қаражат тұрақтандыру қорларының жұмысын күшейтуге және елдің барлық аймағына қолжетімді бағада өнім жеткізуге бағытталмақ.

«Ауылшаруашылығы министрлігімен бірлесіп ай сайын өңірлерге тікелей сиыр етін жеткізу ұйымдастырылуда. Сонымен қатар отандық өндірушілер және сауда желілерімен бірге әлеуметтік маңызы бар азық-түлік тауарлары бойынша бөлшек сауда бағасын бекіту жөнінде өндірушімен меморандум жасалады», – деді ҚР Cауда және интеграция министрі Арман Шаққалиев

Сонымен қатар Үкімет жаңа Салық кодексін кезең-кезеңімен енгізетін болды. Қаржы министрлігінің мәліметінше, құжатта шағын және орта бизнеске салмақ салмас үшін кейбір шектеулер алынып тасталған. Мәселен, тыйым салынған қызмет түрлерінің тізімі қысқарып, тек 44 бағыт сақталады.

Салық және әділет органдары кәсіпкерлерге камералдық және салықтық тексеру жүргізбей-ақ оңайлатылған тәртіппен есептен шығару науқанын өткізбек. Сондай-ақ қосымша құн салығы бойынша есепке қою шегінен асқан бизнес өкілдері әкімшілік жауапкершілікке тартылмайтын болды.

«Бірінші камералдық бақылау болмайды, екінші салықтық тексерулер жүргізілмейді, үшінші сот органдарына тіркеуді, қайта тіркеуді жарамсыз деп тану туралы талап-арыздары берілмейді. 2026 жылғы 1 сәуірге дейін салықтартардың негізгі қарыз сомасы өтелген жағдайда өсімпұл мен айыппұл алынып тасталады», – деді ҚР Қаржы министрі Мәди Такиев.