Орал қаласында заңсыз деп танылған бірнеше құрылыс нысаны бұзылды

Басқармадан мәлім еткеніндей, күні бүгінге дейін үш нысан бойынша нұсқамалар толық орындалды.

Атап айтқанда, өз бетімен құрылыс салушылар нұсқаманы ерікті түрде орындап, нысандарды бұзды. Соның ішінде Х.Есенжанов көшесі 36-мекенжайында орналасқан супермаркет рұқсат құжаттары алынғаннан кейін қайта бой көтерді. Сондай-ақ «Көктем» бау-бақша серіктестігі 134-учаскесінде орналасқан ұялы байланыс операторының антенна-діңгек нысаны бұзылды. Ал Тәуелсіздік көшесі, 12 және Наурыз көшесі 1/2-мекенжайларында көппәтерлі тұрғын үй салушылар рұқсатын рәсімдеп, қазіргі таңда құрылысын жүргізіп жатыр. 

Оған қоса Ж.Досмұхамедов 33-мекенжайында заңсыз салынған төрт қабатты тұрғын үй сот шешімімен бұзылып жатыр. 

- Екі нысан бойынша (М.Мәметова көшесі, 53, кеңсе және Р.Егізбаев көшесі, 155, екі қабатты екі пәтерлі тұрғын үй құрылысы) сот тәртібімен басқарма нұсқамасының күші жойылды, яғни дұрыс емес деп танылды. Тағы екі нысан бойынша (Тәуелсіздік көшесі, 39, 4 қабатты көппәтерлі үй және А.Рахметов көшесі, 13, көппәтерлі тұрғын үй құрылысы) бүгінгі таңда сот процестері жүргізілуде. Жалпы, нұсқамаға сәйкес құрылыс нысандарын бұзу ҚР Ұлттық экономика министрінің 2015 жылғы 30 қарашадағы №750 бұйрығымен бекітілген құрылыс саласында құрылыс жүргізуді ұйымдастыру және рұқсат беру рәсімдерінен өту қағидаларына сәйкес жүзеге асырылады, - деп хабарлады ведомстводан.

Еске сала кетейік, бұдан бұрын Батыс Қазақстанда 40-тан астам нысанда құрылыс талаптары сақталмағанын жазған болатынбыз. 

Сондай-ақ Оралда тұрғындар жаңадан салынған үйге неліктен кіре алмай отырғаны хабарланды.

Оралда үлескерлердің мәселесін шешу жөнінде жұмыс тобы құрылатын болды.