Оралда ботаникалық бақ салынып жатыр

Алма мен жүзімнің жүздеген түрін өсіріп, жергілікті жерге бейімдеген оралдық бағбан тағы бір тың жобаны қолға алды. Қазіргі таңда қалада ботаникалық бақтың құрылысы жүріп жатыр. Бұл жерде болашақта тұрғындар тынығып, жасыл желектің небір түрін тамашалай алады. 

Ерденбек Жылқайдарұлы, тілші:

- Орал қаласындағы ботаникалық бақтың құрылысы былтыр басталды. Жалпы аумағы 13 гектар жер қоршалып, бүгінде визит орталығы мен жылыжайдың құрылысы жүріп жатыр. Ішкі абаттандыру жұмыстары да қоса атқарылуда. Бақтың негізгі байлығы ағаш десек, болашақта мұнда 10 мың түп ағаш егу жоспарланған.

Қайрат Кәрімовтың бастамасын қолдаған қала әкімдігі жер телімін 49 жылға жалға беріп, коммуналдық желілерін тартып берген. Болашақта мұнда ғылыми конференциялар, семинарлар өткізілмек. Әрі кез келген адам қалаған уақытында серуендеп, тыныға алады. Ботаникалық баққа негізінен сирек кездесетін ағаштар егіліп жатыр.

Қайрат Кәрімов, бағбан:

- Ағаштар түр-түрімен егіледі. Мәселен бір секторға қылқан жапырақты ағаш егілсе, одан кейін сүмбіл теректер бөлек болады. Одан әрі шетен және үйеңкі орналасады. Осы жерде жас табиғат жанашырлары, студенттер мен ғалымдар келіп, ғылыми жобаларын жазады деп сенемін. Әлемнің әр құрлығынан көшеттер алдыртамыз. Ботаникалық бақты келер жылдың көктемінде пайдалануға береміз. 

Қайрат Кәрімовтың есімі тек Жайық жұртшылығына емес, республикаға жақсы таныс. Зайыбы Роза екеуі бұдан бұрын алма және жүзім ағаштарын екті. Әйгілі селекционер Исаев атындағы халықаралық тәлімбақта жемістің түрлі сұрыптарын сынақтан өткізді. Батыстың аптап ыстығы мен аязына бейімделген, жоғары өнім беретін сұрыптарды іріктеді. Енді бар күш-жігерін ботаникалық баққа аударған. 

Роза Өмірзақова, ғалым-бағбан:

- Бақтың ең бағалы ағашы мамыргүл деп ойлаймыз. Ол түсіне қарай жалпы жеті топқа бөлінеді. Қайрат екеуіміз мәскеулік ғалым Татьяна Полякованың көмегімен бір жарым ай отырып, әлемдегі ең үздік селекционерлердің сұрыптарын іріктедік. Топтамаға 200 түрін алдық. Сонымен қатар қайың мен жөкенің, емен мен үйеңкінің, сәндік бұталардың үлкен коллекциясы болады. Және кіреберісте ағылшын және парсы раушандары келушілерді қарсы алмақ. 

Ботаникалық бақтың ортасында жасанды тоған орналасқан. Өсімдіктерді суару жүйесі осы жерден нәр алмақ. Жоба қалталы азаматтардың жеке қаржысына жүзеге асып жатыр. 

Авторлары: Е. Жылқайдарұлы, Қ. Ақрап, Э. Аюпов