Май зауыты салынып жатыр

Ертіс-Баян өңірі ауыл шаруашылығы өнімдерін қайта өңдеу ісіне сырттан инвесторларды тартуды жалғастырып жатыр. Жақын уақытта мұнда май экстракциясы зауытының құрылысы аяқталып, жылына 90 мың тонна шикізатты өңдеу көзделіп отыр.

Суретті түсірген – Есенжол Исабек

Павлодар ауданы ежелден агрокешендегі жетістіктерімен та­нымал. Ауданның егіс алқабы биыл 123 мың гектардан асты. Бұл өткен жылмен салыстырғанда 7 мың гектарға артық. Ауыл шаруашылығын әртараптандыру аясында күнбағыс, арпа, қара­құмық және картоп алқаптары едәуір ұлғайтылды. Қазір ди­қандар 30 мың тоннаға жуық астық пен 130 мың тоннадан астам картоп жинап үлгерді. Негізі суармалы егіншілікті дамыту бойын­ша аталған аумақ облыстағы көшбасшы аудан болып саналады. Тек биыл жаңадан 936 гектар суар­­малы егіс алқабы іске қосылды. Жақын болашақта суармалы егіс алқабы 18 мың гектарға жеткізілуге тиіс. Бұл өнімділікті арттыру және егіс алқаптарын кеңейту үшін берік негіз болатынына сөз жоқ.

Кейінгі уақытта бұл өңірде ауыл шаруашылығы өнімдерін қайта өңдеуге мән беріле бас­тады. Мәселен, Кемеңгер ауылында «jielong holdings» компаниясы қуаттылығы жылына 90 мың тонна шикізатты құрайтын май экстракциясы зауытының құрылысын жүргізіп жатыр. Инвестиция көлемі 4 миллиард теңгені құрайды, ал кәсіпорын іске қосылғаннан кейін 80 жаңа жұмыс орны құрылады. Компания директоры Ки Ки ханым жобаның барлық кезеңдерінде облыс әкімдігінен қажетті қолдау алып жатқанын атап өтті.

– Құрылыс кезеңінде біз сыртқы коммуникацияларды жүргізу мәселелерінде көмекті сезіндік. Біз барлық жұмысты аяқтап, келесі жылы өндірісті іске қосуды жоспарлап отырмыз. Облыс басшылығына біздің бастамамызға қолұшын созып, назар аударғаны үшін алғысымды білдіргім келеді, – дейді ол.

Жылына 60 мың тонна ши­кізатты қайта өңдейтін әрі 30 мың тоннаға дейін дайы­н өнім шығаратын тағы бір ма­ңызды жобаны «Кемеңгер Май» компаниясы іске асырып отыр. Кәсіпорынға салынатын инвестицияның көлемі  – 2 млрд теңге көлемінде, 25 жаңа жұмыс орны құрылатын болады. Аталған компания бас­шысы Ибрагим Халяпов аймақ­тың дамуын жылдар бойы бақылағаннан кейін Шығыс Қазақ­стан өңірінен осында көшіп келуге шешім қабыл­дағанын жеткізді.

– Біз жиырма жылдан астам уақыт Шығыс Қазақстан облысында жұмыс істедік. Павлодар облысының қалай дамып жат­қанын әрдайым мұқият қадағалап, оң өзгерістерді көріп, қолайлы инвестициялық ахуалды сезіндім. Сондықтан отбасымызбен бірге көшіп келіп, өндіріс ашуға шешім қабылдадық. Бүгін бұл қадамның дұрыс болғанына көзім жетіп отыр. Аймақ билігі диалогке ашық, бизнесті қолдайды әрі өркендеуіміз үшін ауадай қажет барлық жағдайды жасауға ынталы. Осындай атмосферада жұмыс істеп, жаңа жобаларды іске қоссам, болашаққа инвестиция салсам деймін. Ертіс бойы – бұл мүмкіндіктер аймағы ғана емес, сонымен қатар өмір сүру мен жос­пар құру үшін жайлы өлке, – деп атап өтті инвестор.

Атап өтерлігі, Павлодар ауда­ны картобымен де танымал. Мұндағы диқандар кейінгі уақытта қытырлақ (chips) өн­ді­рісіне арналған картоп өсі­руге де маманданған. Мысалы, «Агросоюз» фермерлік шаруашылығы өз өнімін халық­аралық «PepsiCo» компаниясына өткізеді. Бұл жергілікті фермерлерге жаңа нарықтарды бағын­дыруға және оларды жаһандық өндіріс тізбектеріне біріктіруге себепкер. Сондай-ақ мұнда жи­налған өнімді сақтаудың заманауи инфрақұрылымы құрыл­ған. Сыйымдылығы 15 мың тон­на көкөніс қоймасы өнімді сақтауға, оның үздіксіз жет­кізілуін қамтамасыз етуге мүм­кіндік береді. Болашақта аумақта қытырлақ өндірісін жолға қоюға ынталы инвесторлар болса, облыс билігі қолдауға дайын екендерін білдіріп отыр. Инвестиция тарту, экспортқа бағдарлау – өңірдің стратегиялық басымдығы. Жаңа кәсіпорындар ауыл тұрғындары үшін жаңа жұмыс орындарын ашып қана қоймай, жаңа өнімдер шығарып, кірісті арттырады әрі облыс экономикасын нығайтады.

Павлодар облысы,

Павлодар ауданы