​Орынбор ГӨЗ жұмысының тоқтатылуы газ жеткізілуіне әсер етпеді Энергетика министрлігі

Қазақстан Республикасы Энергетика министрлігінің хабарлауынша, Орынбор газ өңдеу зауытында (ГӨЗ) шикізат қабылдаудың уақытша тоқтатылуына байланысты Қазақстандағы газ жеткізілуі қалыпты режимде жүргізілуде. 

Министрлік мәліметінше, БАҚ пен әлеуметтік желілерде «Астана мен басқа өңірлерде газ тапшылығы болуы мүмкін» деген ақпарат шындыққа сәйкес емес. Елдің газдандырылған өңірлеріне, соның ішінде елордаға газ толық көлемде және шектеусіз жеткізілуде. Газ жеткізудің тұрақтылығы алдын ала қарастырылған резервтік тетіктер есебінен қамтамасыз етілуде. Жеткізілмеген газ көлемі келісімшарттар шеңберінде жедел түрде толықтырылуда, сондықтан ішкі тұтынушылар мен елордалық ЖЭО-да газ тапшылығы жоқ және болашақта да болмайды.

Серіктестердің хабарлауынша, жақын арада Орынбор ГӨЗ-де газ қабылдау қайта басталады деп күтілуде. Уақытша шектеулерге байланысты Қарашығанақ кен орны операторы өндіру көлемін бақылаулы түрде азайтты.

Министрлік атап өткендей, аталған шара Қазақстанның ішкі нарығына газ жеткізу міндеттемелеріне әсер етпейді. ГӨЗ қалыпты жұмысына көшкеннен кейін өндіріс көлемі жоспарланған деңгейде жалғасады. Сонымен қатар, Қарашығанақта газ өңдеу зауытын салу мәселесі Үкіметтің стратегиялық басымдықтарының бірі болып отыр және пысықталу үстінде.

Энергетика министрлігі азаматтар мен БАҚ-ты тек ресми ақпаратқа сенуге және жалған ақпаратқа жол бермеуге шақырады. Аталған жағдай Қазақстан Республикасы Үкіметінің тұрақты бақылауында.

Бүгін, 12:42