Өскемендегі сарбаз өлімі: әскери бөлім командирі мен екі орынбасары қызметінен кетті

Бас әскери прокуратураның мәліметінше, оқиға Өскемен гарнизонындағы әскери бөлімдердің бірінде болған. Тергеу барысында батальон және взвод командирлерінің жарғыдан тыс қарым-қатынасқа жол бергені, сондай-ақ қаза тапқан сарбаз бен оның қызметтестеріне психологиялық қысым көрсеткені анықталған.

– Тергеу барысында лауазымды тұлғалардың бірнеше рет жарғыдан тыс қарым-қатынасқа жол бергені, әскери қызметшілерге психологиялық қысым көрсеткені дәлелденді. Сонымен қатар взвод командирі қару-жарақты сақтау тәртібіне тиісті бақылау жүргізбей, қызметтік міндеттерін орындаудан шет қалған. Жиналған дәлелдемелер негізінде билікті асыра пайдалану және қызметке салғырт қарау фактілері бойынша қылмыстық іс сотқа жолданды, – делінген Бас әскери прокуратура хабарламасында.

Қабылданған шаралар аясында әскери бөлім командирі мен оның екі орынбасары қызметінен босатылып, тағы 9 лауазымды тұлға тәртіптік жауапкершілікке тартылған.

Ведомство мәліметінше, тергеу барысында қажетті сараптамалар жедел жүргізіліп, қылмысқа қатысы бар барлық тұлғалар анықталған. Сонымен қатар әскери қызметшілердің қаза болу деректерін тергеу тәсілдері жетілдіріліп, тиісті органдар арасында сараптамаларды жедел жүргізуге бағытталған меморандумға қол қойылған.

Айта кетейік, биылғы 25 қаңтарда Өскемендегі сарбаз өлімінен соң Қорғаныс министрлігі ресми мәлімдеме жасады.

- Жыл басынан бері Қарулы Күштерде әскери қызметшілердің қаза табуына байланысты ҚР Қорғаныс министрлігінің басшылығы қаза болғандардың отбасыларына, туған-туыстарына және жақындарына шынайы көңіл айтады.

Қарулы күштердің басшылығы болған жағдайдың барынша ауыр екенін және әскери қызмет қауіпсіздігін қамтамасыз ету үшін жауапкершіліктің толық көлемін терең түсінеді. Қорғаныс министрі авиация генерал-лейтенанты Дәурен Қосановтың тапсырмасы бойынша мұндай қайғылы оқиғалардың алдын алуға бағытталған шұғыл шаралар кешені қабылданды, - делінген хабарламада.