Өзбекстанда төрт аяқты нәресте дүниеге келді

Өзбекстанның Сурхандария облысында сирек кездесетін туа біткен патологиямен сәби дүниеге келді, – деп хабарлайды Aikyn.kz сайты. 

Ұл бала 28 сәуір күні Сурхандария облысының Шерабад ауданында туған. Келесі күні ол Самарқанд облыстық көпсалалы балалар медициналық орталығына жеткізілген.

Тексеру барысында дәрігерлер нәрестеден бірнеше туа біткен даму ақауын анықтаған. Мамандардың мәліметінше, бұл жағдай жабысып туған егіздер синдромымен байланысты болған. Соның салдарынан сәбидің денесінің төменгі бөлігінде қосымша аяқтар қалыптасқан.

Хирургтер күрделі екі операция жасап, артық аяқтарды алып тастаған. Олардың екеуі толық дамымаған әрі қозғалыссыз болғаны айтылады.

Қазіргі уақытта баланың жағдайы тұрақты. Алайда дәрігерлер оның толық сауығуы үшін алдағы уақытта тағы бірнеше ота жасау қажет екенін хабарлады.

Мамандардың айтуынша, мұндай патология кезінде нәрестелердің аман қалу көрсеткіші төмен болады. Соған қарамастан дәрігерлер баланың өмірін сақтап қалу үшін барлық мүмкіндікті пайдалануға ниетті.

Дәрігерлер кішкентай науқастың жағдайын тұрақты бақылауда ұстап отыр.