Павлодарда Еңбек ерлері бас қосты

Павлодарда Қазақстанның Халық қаһармандары мен Еңбек ерлерінің IV республикалық конференциясы өтті. Оған еліне еңбегі сіңген, Отанға жанқиярлықпен қызмет етудің үлгісі болған айтулы тұлғалар қатысты.

Достық үйі бүгінде нағыз отансүйгіш жандардың жиі бас қосатын жеріне айналған. Бүгін мұнда елдің әр өңірінен Халық қаһармандары, Еңбек ерлері, ардагерлер мен қоғам қайраткерлері келді. Құрметті қонақтар қатарында  Екібастұздан келген Еңбек Ері Рышат Әмренов те бар. Оның жөндеу-құрылыс учаскесінің ағаш ұстасынан кен өндіру учаскесінің механигіне дейінгі еңбек жолы көпке үлгі.

Рышат Әмренов, Қазақстанның Еңбек ері:

- Ең бастысы адам өз еңбегін, өз мамандығын сүйіп қызмет істеу. Бақыт дегеніміз айтамыз ғой таңертең қуанып жұмысыңа бару, бір қуанышпен өз отбасыңа оралу. Қандай бір жұмыс істесең де адал болсаң, сол еңбегіңді сүйіп жұмыс істесең марапат та атақ та адамды өзі табады екен!  

«Ал еңбегіңнің жануы қарапайым нәрселерден - жұмыс істеуге, көмектесуге және жауапты болуға деген ұмтылыстан басталмақ. Мұндай асыл қасиеттерді бойымызға сіңіруде аға ұрпақ өкілдерінен үйренеріміз көп»,- дейді жастар. 

Дзюба «Ассамблея жастары» РҚБ мүшесі:

- Кейінгі жас буын үшін осындай еңбексүйгіш адамдармен кездесудің маңызы зор. Өйткені жастар – елдің болашағы!  Олардың еңбек жолы бізге әркез үлгі. Сондықтан біз үшін, жастар үшін Еңбек ерлерімен  кездесіп, сөйлесудің өзі үлкен мәртебе. 

Түрлі буын өкілдері бас қосқан конференция мақсаты орындалды. Бастысы, ерен еңбегімен елге танылған тұлғалар тәжірибелерін ортаға салса, жастар да бейнет түбі зейнет екеніне көз жеткізді.  

Авторлары: Талғат Серікқалиұлы, Валентина Леонова, Дәулет Қошқарбаев