Полиция Астанадағы қару жарақ арсеналы бар шетелдіктер туралы жазбаға жауап берді

Мәжіліс депутаты Мұрат Әбенов Астанада ірі ұстау операциясы жүргізілгені туралы хабарлады. Бұл туралы ол әлеуметтік желіде жазды. Жағдайға қатысты елордалық полицияның баспасөз қызметі пікір білдірді, деп хабарлайды Tengrinews.kz тілшісі.

Мәжіліс депутаты Мұрат Әбенов Астанада ірі ұстау операциясы жүргізілгені туралы хабарлады. Бұл туралы ол әлеуметтік желіде жазды. Жағдайға қатысты елордалық полицияның баспасөз қызметі пікір білдірді, деп хабарлайды Tengrinews.kz тілшісі.

Әбеновтің айтуынша, түнде Астанадағы тұрғын үй кешендерінің бірінде ІІМ қызметкерлері қаруланған екі шетелдікті ұстаған.

"Түнде "Хайвилл" ауданындағы пәтерде қару-жарақ арсеналы: мылтықтар, тапаншалар табылып, екі шетелдік ұсталды", - делінген оның жазбасында.

Біз жағдайға байланысты пікір алу үшін полицияның баспасөз қызметіне хабарластық.

"Әлеуметтік желілерде тараған қару-жарақ арсеналы бар шетелдіктердің ұсталуы туралы ақпарат шындыққа жанаспайды", - деп хабарлады Астана полиция департаменті.

Бұл рете тұрғын үйге күдікті заттардың әкелінгені расталды.

"Хабарлама қырағы тұрғыннан түскен, оқиға орнына полиция қызметкерлері дереу жетті. Тексеру барысында жәшіктің ішінде тарихи және мәдени құндылығы бар антикварлық қару-жарақ бұйымдары болғаны анықталды", - деп түсіндірді ПД.

Полиция мәліметінше, тәркіленген заттар заманауи жауынгерлік қаруға жатпайды.

"Сарапшылар қорытындысына сәйкес, олар заманауи жауынгерлік қару түріне жатпайды. Тұрғындарға қауіп төніп тұрған жоқ", - деді ведомство өкілдері.

Сонымен қатар полиция аталған факті бойынша қолданыстағы заңнама аясында тексеру жүріп жатқанын хабарлады.