Президентпен арасы суыған миллиардер ессіз технологиямен ұшатын көлік жасайтынын мәлімдеді

Gizmodo сайтына сілтеме жасаған Aikyn.kz миллиардердің жаңа жобаларының сипаттамасын түсіндіреді.

Миллиардер Илон Маск жұма күні (31 қазан) америкалық танымал тележүргізуші Джо Роганның подкастында (The Joe Rogan Experience, JRE) қонақ болып, көлемді сұхбат берді. Әлемдегі ең көп тыңдалатын подкаста миллиардер компанияларының жаңалықтарын да жұмбақтап айтқан. Маск жыл соңына дейін Tesla-ның ұшатын нұсқасын көрсеткісі келетінін хабарлаған.

Масктың ұшатын көлік туралы арманы Tesla Roadster жобасымен байланысты. Бұл автомобиль алғаш рет 2008-2012 жылдары шығарылған. Екінші буын Roadster-ді ол бірнеше жылдан бері уәде етіп келеді, бірақ 2020 жылғы бастапқы мерзімнен бері іске аспаған. Роган жобаның мәртебесін сұрағанда, Маск оның ұша алатынын айтты, бірақ нақты түсіндіруге біраз уақыт қажет болды.

«Біз... прототипті көрсетуге жақындап қалдық. Бір нәрсеге кепілдік бере аламын: бұл көрсетілім есте қаларлық болады. Өте есте қаларлық. Досым Питер Тиль (PayPal төлем жүйесінің негізін қалушы) бірде: «Болашақта ұшатын көліктер болуы тиіс. Бірақ олар әлі жоқ» деген болатын. Сол ой есімде», – деп түсіндірді.

Джо Роган аппаратта «жасырын қанаттар» бола ма деп сұрады. Маск жобаның егжей-тегжейін түсіндіруден бас тартып, «жария еткенге дейін елестету қиын» деген. Бірақ бұл өнім «тарихтағы ең есте қаларлық жаңалықтардың бірі болатынын» айтқан. Ол оны жыл соңына дейін таныстыруға үміттенетінін жеткізген.

Бұл Маскты жақсы білетіндер үшін тосын жаңалық емес. Ол жиі дайын емес идеяларды ерте жариялаумен танымал. Бірақ олардың көбі уәде етілген түрде жүзеге аспайды. Мысалы, оның Hyperloop жобасы – автономды қоғамдық көлік түрінде сағатына 250 км жылдамдықпен 16 адамды тасымалдауға арналған. Нәтижесінде Маск Лас-Вегаста кәдімгі Tesla көліктері жүретін туннель ғана салды.

Сарапшылар Илон Маск ұшатын көліктің прототипін көрсете алатынын, бірақ бұл нарыққа дайын өнім еместігін айтуда. Өткен жылы ол екі орынды Cybercab дрон-таксиды таныстырды. Бірақ ол әлі қолданысқа берілген жоқ. Ал Robotaxi болса, «автономды» режимде жолаушылар таситын Tesla көліктері. Ол Техаста адам тасымалдауды бастады.

Ұшатын көлік саласындағы басты мәселе – қауіпсіздік пен күрделілік. Ұшу – жүргізуден әлдеқайда қиын әрі қауіпті. Оның қолдану көлемі де шектеулі. Бұндай аппараттарды тек лицензиясы бар ұшқыш қана басқаруға тиіс. Егер ол ұшқышсыз автономды аппарат болса, онда әуе қозғалысын үйлестіру секілді логистикалық проблемалар туындайды.

Илон Маск: «Бәрінен бұрын, оның шынымен жұмыс істейтініне көз жеткізуіміз керек. Бұл көлікте ақылға сыймас технология бар. Өте... ессіз технология», – дейді.

Роганның «бұл технология Roadster-дің бұрынғы нұсқасынан өзгеше ме» деген сұрауына Маск «иә» деп жауап берген.

«Бұл – ақылға қонымсыз нәрсе. Бұл тіпті көлік пе, білмеймін. Көлікке ұқсайды, бірақ Джеймс Бондтың барлық машиналарын біріктірсек, біздің көлік одан да ессіз болмақшы», – дейді ол.

Әлемнің ең бай адамы Илон Масктің жыл соңына дейін көрсетуді жоспарлаған Tesla Roadster «ақылға сыймас технологиясы бар» көлік болуы мүмкін.  Алайда ол сол прототип нұсқасында қалып қоймай ма екен деген күмән де бар.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.