Қайрат Олимпиакос арасындағы кездесуге 6 күн қалды

«Қайрат» - «Олимпиакос» арасындағы кездесуге 6 күн қалды, деп хабарлайды 24KZ. Бірақ бұл жолы Чемпиондар лигасына жанкүйерлердің аса қызығушылығы байқалмайды. «Матч билеттері өтпей жатыр», – дейді сарапшылар. Оған қандай факторлар әсер етуі мүмкін?

Күн райының қолайсызығы «Қайрат» жанкүйерлеріне де ыңғайсыздық туғызды. Дегенмен «Чемпиондар лигасындағы матчтың елордаға ауысуы Алматы командасына сәл де болса басымдық береді», – дейді сарапшылар. Басты себеп – жасанды алаң.

«Қайрат» – «Олимпиакос» ойынының билеттері 28 қарашадан бері сатылып жатыр. Бағалары бұрынғымен салыстырғанда арзан. Бірақ бос орын көп. Ең арзан билет 15 мыңнан басталып, 50 мың теңгеге дейін барады.    

Шыңғыс Сенғажин, спорт журналисі:

- Әрі кетсе Алматыдан 500-ге, мыңға тарта жанкүйер келер. Әлі де, көріп тұрсыздар ғой, билет сол қалпы тұр. Кейбір секторлардың мұрты бұзылмаған.

Расында Астана Арена стадионы жартылай бос қалуы мүмкін. Мәселен, құны 25 мың теңге тұратын Е6, Е7, Е8 секторларындағы билеттердің 90%-і әлі өтпеген. Яғни сол қалпында тұр.  

Асқар Хамиден, спорт сарапшысы:

- Билет бағасын төмен қою керек пе еді деп есептеймін. Себебі басқа қалада ойнағаннан кейін қызығушылықтың қаншалықты жоғары болатыны түсініксіз. Егер осыған дейін ойындар өткізсе түсінікті болар еді. Одан бөлек Дастан Сәтбаевтың факторы да белгілі бір деңгейде әсер деп ойлаймын. Ойынға келетін жанкүйерлердің көбі жас таланттың ойынын көргісі келген. Бірақ сары қағазға байланысты кездесуге қатыса алмайды. Сондықтан бұл факторлар да тікелей әсер етеді деп есептеймін өз басым.

Осыған дейін «Қайрат» чемпиондар лигасында көш бастамаса да, билет бағасы бойынша бірінші орында тұрды. Мәселен, Алматыдағы стадионға кіру құны 30 бен 250 мың теңге аралығында болған еді. Енді нағыз жанкүйерлер билет арзандады деп қуанғанда клуб басшылығы ойынды Астанаға ауыстырып жіберді.            

Азамат Атагелді, Ticketon компаниясының өкілі:

- Нақты қанша билет сатылды немесе сатылмады деген ақпаратты сіздерге айту қиын болып тұр. Өйткені мұны әлі зерттеп, жүйенің ішінен қарау керек болады. Сондықтан нақты ақпарат бере алмай отырмыз. Бірақ сатылымда билеттер әжептәуір бар әлі.

Сарапшылар: «матчтың Астана Аренада өтуі «Қайрат» үшін артықшылықтары бар», – дейді.

Шыңғыс Сенғажин, спорт журналисі:

- «Қайратқа», әрине, кедергісін келтіреді. Бірақ оңтайлы жағын қарауымыз керек, «Олимпиакосқа» қарсы. Егер Орталық стадионда қабылдайтын болсақ, олардың табиғи алаңда, шөпте қалай ойнайтынын білесіздер. Сондықтан алаңға байланысты басымдық көрсетуге болады.  

Асқар Хамиден, спорт сарапшысы:

- Жаттығу жұмыстарын жасанды алаңда жүргізіп жатқаны анық. Басымдық болады. «Олимпиакос» осыдан 9 жыл бұрын «Астанамен» Еуропа лигасының топтық кезеңінде ойнаған. Ол кезде Астана Аренада 2:2 есебі тіркелген. Олардың ұшып келу уақыты бар, ауа райының қолайсыздығы белгілі бір деңгейде кішкене басымдық береді.    

Матч 9 желтоқсан 20:30-да басталады. Артынша 20 желтоқсан күні «Брюггені» дәл осы «Астана Аренада» стадионында қабылдайды.

Авторлары: Мерей Қанапия, Ержан Қанапия, Ақылбек Есімсейтов