Қарағанды облысында азық түлік бағасы бақылауда

Қарағанды облысында фермерлер өз өнімдерін делдалсыз, тікелей және арзанға сататын әлеуметтік павильондар ашылып жатыр.

Бұл - сауда орындарындағы ет, сүт өнімдері мен көкөніс бағасын реттеуге мүмкіндік береді. Сонымен қатар өңірдегі тұрақтандыру қорының қоймаларында қант, күнбағыс майы, жарма, ұн және өзге де азық-түліктің мол қоры сақтаулы тұр. Баға көтерілсе, бірден дүкендерге жеткізіледі. Мысалы былтыр қымбатшылықтың алдын алу үшін халыққа 330 тоннадан астам қант және 900 тоннадан астам картоп сатылды.

Әлеуметтік дүкендерге жұрттың көбі келіп сауда жасайды. Себебі оларда азық-түлік бағасы нарықтан орта есеппен 10–15% арзан. Мысалы сиыр еті мұнда 3700 теңге болса, базарда ол 4500 теңге тұрады. Сүт өнімдері мен көкөніс, жемістің де бағасы қолжетімді.

Роза Ысқақова, қала тұрғыны:

- Қымбат емес, орталықтағы дүкендерден арзан. Екі жүз теңге, жүз теңге сондай айырмашылықтары бар ғой әлеуметтікте. Орталыққа барып жүргеннен үйдің қасынан ала қоямыз.

Қалада қазір осындай төрт әлеуметтік дүкен бар, олардың екеуі жақында Майқұдықта ашылды. Өңірге қарасты қала, аудандарда да осындай дүкендер іске қосылуда. Мұнда фермерлер өнімін делдалсыз тікелей әкеліп сатады.

Алмас Исабеков, фермер:

- Бұл дүкенде біз жалға ақша ештеңе төлемейміз, коммуналдық төлем төлемейміз. Оны үкімет өзінің мойнына алып отыр. Бізге тек төмен бағамен жұмыс істеу керек. Жылқы өсіреміз, қой өсіреміз, сиыр, өзіміздің мал бордақылау алаңдарымыз бар.

Өңірде азық-түлік бағасы қымбатшылығының алдын алу үшін тұрақтандыру қорының қоймаларында 452 тонна өнім сақтаулы тұр. Мысалы қарақұмықтың 68 тоннасы, 48 мың литр күнбағыс майы, 254 тонна қант бар. Баға қымбаттаса дүкендерге бірден жөнелтіледі. Бұдан бөлек, жергілікті билік картоп, сәбіз, қырыққабат және пияз жеткізу бойынша фермерлермен тікелей келісімшарт жасаған.

Қуандық Ахметов, Ауыл шаруашылығы және жер қатынастары басқармасының бөлім басшысы:

- Жеміс-көкөніс бойынша 19 мың тоннадан астам өнімге фермерлермен арада келісімшарт жасалды. Оның ішінде 11 700 тонна картоп, 1 800 тонна пияз және 2 600 тонна сәбіз бар. Бұл қор көктемге дейін жеткілікті. Өнімдер баға өскен жағдайда нарыққа шығарылатын болады.

Фермерлерді қолдаудың және тұрғындарды бағасы қолжетімді азық-түлікпен қамтамасыз етудің тағы бір тиімді тәсілі- ауыл шаруашылығы жәрмеңкелері. Мұнда экологиялық таза өнімді делдалсыз, арзанға сатып алуға болады. Былтыр өңірде 540 жәрмеңке өтіп, фермерлер 8500 тоннадан астам түрлі өнім сатты.

Авторлары: Руслан Нұрланұлы, Сайлау Игіліков, Аман Хамит