Қарағанды облысында кремний қорытпасын өндіретін зауыт іске қосылды

Қарағанды облысындағы «Сарыарқа» арнайы экономикалық аймағында кремний қорытпасын өндіретін зауыт іске қосылды.

Бұл өңірде кремний кластерін құрудың алғашқы кезеңі. Жаңа «Qaragandy Power Silicon» зауыты елдегі өнеркәсіптің дамуы үшін маңызды қадам. Кәсіпорын заманауи технологиямен жұмыс істейді. 

Жоба Қазақстан Республикасының Президенті Қасым-Жомарт Тоқаевтың тапсырмасы бойынша жүзеге асырылды. Мемлекет басшысы үш жыл ішінде айрықша қажет материалдар шығаратын кемінде үш кәсіпорынды іске қосуды міндеттеген болатын. Кремний өндірісі-осындай ауқымды жобалардың бірі. Кәсіпорында шикізаттан кремний қорытпалары алынады. Бұл материалдар металлдың беріктігін арттырып, салмағын жеңілдетеді және жоғары температураға төзімді етеді.

Талғат Мақаев, "Qaragandy Power Silicon" ЖШС бас директоры:

- Мұндай ауқымды жобалардың қолға алынуы елімізде жүргізіліп отырған экономикалық саясаттың нәтижесі екенін атап өткіміз келеді. Президент жүргізіп отырған саясат инвесторларды қолдауға, олардың құқықтарын қорғауға, ұзақ мерзімді инвестициялар үшін ашық әрі болжамды жағдай қалыптастыруға бағытталған. Дәл осы тұрақтылық пен сабақтастық инвесторларға сенім береді және ірі жоғары технологиялық бастамаларды жүзеге асыруға мүмкіндік туғызады.

«Qaragandy Power Silicon» зауытын мемлекет қолдауымен голландиялық компания салды. Кәсіпорын жылына 92 мың тонна кремний қорытпасын өндіре алады. Жобаға Қазақстанның Даму Банкі мен Өнеркәсіпті дамыту қорының бірлескен қаржыландыруы арқылы 140 миллион доллардан астам инвестиция құйылған. Бүгінде толық штаттық режимде жұмыс істеп тұр. Өндіріс іске қосылғалы қысқа мерзімде халықаралық стандарттарға сай 2,5 мың тоннадан астам өнім шығарған. Мұнда қазір 500 адам еңбек етеді. Олардың басым дені жастар.

Әділет Мағаз,"Qaragandy Power Silicon" ЖШС ауысым шебері:

- Осындай заманауи жаңа зауыт іске қосылды дегенді естіп осы жерге жұмысқа келдім. Индустриалды даму мақсатында осы еліміздің экономикасын арттыруға, өңірдің экономикасын дамытуға үлесімді қосып жатырмын деп есептеймін.

Заманауи кремний зауытының іске қосылуы ел индустриясы үшін үлкен жаңалық, дейді мамандар. Мұнда шикізатты өндіруден бастап кремнийді терең өңдеуге дейінгі толық жұмыс ауқымы қамтылған. Алдағы бірнеше жылда өндірісті кеңейту жоспарланып отыр. Келесі кезеңде автомобильдер мен техника өндірісінде қолданылатын кремний шығарылады. Одан кейін күн батареялары мен микроэлектроникаға арналған кремний өндірісі жолға қойылады.

Зауыттың жұмысы үшін қомақты электр энергиясы қажет. Сондықтан компания басшылығы кәсіпорынды да, қаланы да электр энергиясымен қамтамасыз ететін жылу электр орталығын салуды жоспарлап отыр. Ал болашақта Астанада күн панельдерін шығаратын зауыт ашпақ. Бұл «жасыл» энергетиканы қолдап, шикізат өндіруден бастап дайын материалдарды шығаруға дейінгі үлгілі жоба болады. Ол мемлекет пен даму институттарының қолдауымен іске асырылып жатыр. Бүгінгі таңда Үкімет пен «QPS» компаниясы жобаның тұрақты жүзеге асырылуын қамтамасыз етуге бағытталған инвестициялық келісімге қол қойды. Сонымен қатар «QPS» компаниясы мен «Бәйтерек» холдингі жобаны қаржыландыру және жан-жақты қолдау көрсету туралы келісімге келді. 

Руслан Нұрланұлы, Сайран Ақамбаев, Аман Хамит