Қарағанды облысында жылына 2400 тонна ет өнімін өндіретін кешен іске қосылды

АСТАНА, 21 сәуір – Sputnik. Қарағанды облысында жылына 2400 тонна ет өнімін өндіретін кешен іске қосылды, деп хабарлады ауыл шаруашылығы министрлігі.

Абай ауданында қолға алынған жобаға тартылған инвестицияның жалпы көлемі 800 млн теңге.

Өндірістік инфрақұрылымға мал сою бекеті, қайта өңдеу цехтары, консервілеу желісі, сондай-ақ компанияның өзіне тиесілі қой шаруашылығы фермасы кіреді.

"Кәсіпорын тәулігіне 300 басқа дейін ұсақ мал және 50 бас ірі қара етін өңдеуге қуатты. Алғашқы кезеңде шикізат жергілікті фермерлерден сатып алынады, бұл ауданның ауыл шаруашылығы тауар өндірушілері үшін қосымша өткізу нарығы болады", - деп жазылған хабарламада.

Кейін компания өз мал басын көбейтуді жоспарлап отыр, бұл шикізат базасын нығайтуға мүмкіндік береді.

Кешенде салқындатылған және мұздатылған ет, ет консервілері, вакуумдық қаптамадағы өнімдер өндіріледі. Өнімдер халал талаптарына және азық-түлік қауіпсіздігінің халықаралық стандарттарына сай болады. Бұл тек Қазақстан нарығына ғана емес, сонымен қатар Парсы шығанағы елдеріне, Еуропа мен Қытайға экспорттауға жол ашады.