Қарағандыда интеграциялық орталық ашылды

Қарағандыда мүгедектігі бар жандарға арналған интеграциялық орталық ашылды.

Шоколад пен кофе дайындау ісі, мобилография және наубайшы мамандығын меңгерем дегендер тегін білім алады. «Ізденіп, еңбек етіп, әлеуметтік жағдайын жақсартуға мүмкіндік бар», - дейді мамандар.

19 жастағы Санжар Мұхамбетжанов — «Бізбен бірге бол!» интеграциялық орталығының шәкірті. Ол мобилографияның қыр-сырын үйреніп жүр. Төрт айдың ішінде жаңа кәсіпті жақсы меңгеріп алған. Қазір Санжар өз бетімен қысқа бейнебаян түсіре алады. Бұл арқылы табыс таба бастаған. 

Санжар Мұхамбетжанов, «Бізбен бірге бол!» орталығының шәкірті:

– Маған видео түсіру қатты ұнайды. Ұжым өте тату, бір отбасы сияқты. Бір-бірімізді әрқашан қолдаймыз. Мұнда жаңа достар тауып, өзіме деген сенімділігім арта түсті.  

Интеграциялық орталықта уақыт талабына сай мамандықтар оқытылады.  16 жастан асқан  жандар компьютерді меңгеру, кофе дайындау, тігіншілік, аспаз сияқты кәсіп түрлерін меңгереді. «Соның ішінде шоколад дайындау курсына қызығушылар көп», - дейді орталық оқытушысы Алтыншаш Жанатаева.

Алтыншаш Жанатаева, «Бізбен бірге бол!» орталығының оқытушысы:

 – Осы шоколадтарды біздің тәрбиеленушілер өздері жасайды. Ең алғашында біз көрсетеміз, қадағалаймыз. Бәрін үйретіп болғаннан кейін біздің тәрбиешілер өздері жасайды, әрине, біздің қолдауымызбен.

Өңірде менталдық ерекшелігі бар жандар мүгедектігі бар адамдардың шамамен 60 пайызын құрайды. Колледжден кейін олардың көпшілігі өз мамандығы бойынша жұмыс таба алмайды. Сол себепті бұл орталықта оларды оқытып қана қоймай, жұмысқа орналасуға да көмектеседі.

Әсел Бекбаева, «Бізбен бірге бол!» интеграциялық орталығының директоры:

– Мұндай жандарға ерекше көзқарас пен қолдау қажет екенін жақсы білемін. Біз шетелдік тәжірибені зерттей келе, олардың креативті салада да, қызмет көрсету саласында да табысты жұмыс істей алатынын көрдік.

Орталықта білім алып жүрген менталдық ерекшелігі бар жандар қоғамда өз орнын таба алатынын дәлелдеп үлгерді. Мысалы, биыл жазда мүгедектігі бар жеті адам «Жасыл ел» еңбек жасағының қатарында еңбек етті.

Лиана Жамлиханова, Нұрлан Жақыпбеков, Сайран Ақамбетов, Аман Хамит