Қарағандыда зейнеткерлерді алдаған алаяқ ұсталды

Фото: ашық дереккөз

Алдын ала мәлімет бойынша ол қариялардың сеніміне кіріп, 2,8 миллион теңгеден астам қаражатты иемденген. 

Тергеу барысында анықталғандай, күдікті өз әрекеттерін түскі уақытта жүзеге асырып отырған. Екі зейнеткердің де бір-біріне жақын маңдағы үйлерде тұруы қылмыстың мұқият жоспарланғанын аңғартады. 

Талғарда алаяқтар Джеки Чанның бейнесін пайдаланып зейнеткерді алдауға тырысқан

Алғашқы жағдайда күдікті өзін учаскелік инспектор ретінде таныстырып, 77 жастағы қарияның үйіне кірген. Телефон нөмірлерін «жаңарту» сылтауымен ол зейнеткердің депозиттік шотынан өз есепшотына 1 миллион 350 мың теңге аударып жіберген. Қария қаражаттың жоғалғанын тек кешкі уақытта байқаған.

Келесі күні алаяқ 74 жастағы қала тұрғынын алдаған. Бұл жолы ол өзін әлеуметтік қызметкер ретінде таныстырып, медициналық такси рәсімдеуге көмектесетінін айтқан. Сенімге кіру үшін әйелге 20 мың теңге берген. Кейін «такси картасын рәсімдеу» барысында зейнеткердің биометриялық бейнежазбасын түсіріп алған. Арада аз уақыт өткен соң банк қызметкерлері хабарласып, оның атына несие рәсімделгенін жеткізген. Келтірілген шығын көлемі 1 миллион 500 мың теңгені құрады. 

ШҚО-да полицейлер зейнеткерді алаяқтардан құтқарып қалды

Жедел-іздестіру шаралары нәтижесінде күдіктінің жеке басы анықталды. Қарағанды қаласының 31 жастағы тұрғыны бұған дейін де алаяқтық қылмыстары үшін сотталған. Қазіргі уақытта күдікті қамауға алынып, сотқа дейінгі тергеу амалдары жүргізілуде. Полицейлер оның осыған ұқсас өзге де қылмыстарға қатысы бар-жоғын тексеріп жатыр.

Айта кетейік, Ақмолада алаяқтарға алданған кәсіпкер 24 млн теңгесінен айырылды.