Қазақ қайсар халық екенін шаршы алаңда дәлелдедім Даниял Шалқарбай

Бахрейннің Манама қаласында өтіп жатқан жасөспірімдер арасындағы Азия ойындарында қазақстандық боксшы Даниял Шалқарбай алтын медаль жеңіп алды. Спортшы бұл жеңіске оңайлықпен жетпегенін айтты , – деп хабарлайды  Aikyn.kz Оlympic.kz-ке сілтеме жасап.

"Өз өнеріме өте ризамын. Барлығы ойдағыдай өтті. Бапкерлер дұрыс кеңес беріп, үлкен қолдау көрсетті. Финал алдында аздап қысым болды, бірақ рухани тұрғыда сынған жоқпын. Шаршы алаңда қазақ қайсар халық екенін дәлелдедім. Бұл Азия ойындарында бар еңбегім мен дайындығымның нәтижесін көрсете алдым. Бұл медаль маған оңайлықпен келген жоқ. Талай тер төгіп, көптеген қиындықтан өттім. Барша қолдау көрсеткендерге көп рақмет айтамын. Финалдағы өзбек боксшысына қарсы кездесу өте тартысты өтті. Қарсылас та жақсы дайындалған. Ол да бар күшін салды. Дегенмен жеңіс маған бұйырды. Алда жастар құрамасына қосылып, Олимпиада мен әлем чемпионаттарына дайындаламын. Демалатын уақыт жоқ," - деді Шалқарбай.

Айта кетейік, Даниял Шалқарбай 66 келіге дейінгі салмақ дәрежесінде үздік атанды.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.