Қазақмыс Жезқазған мен Сәтбаевтағы ірі әлеуметтік нысандарды аралады

Ұлытау облысында әлеуметтік және инфрақұрылымдық жобаларды жүзеге асыру жалғасып жатыр.

«Қазақмыс корпорациясы» ЖШС басқармасының төрағасы Руслан Өскенәлі Жезқазған мен Сәтбаев қалаларындағы бірқатар нысанды аралап, құрылыс жұмыстарының қарқыны мен сапасын тексерді.

Жұмыс сапары барысында Жезқазғандағы Кеңгір су қоймасының жағалауын абаттандыру жобасына ерекше назар аударылды. Жоба «Қазақмыс» компаниясының өз қаражаты есебінен жүзеге асырылып жатыр. Қаржыландыру көлемі – 3,4 млрд теңге.

Жағалауға жақын аумақта облыстық орталық мешіттің құрылысы да аяқталуға жақын. Жұмыстар толық біткеннен кейін бұл аумақтар серуендеуге, демалуға және бос уақыт өткізуге арналған бірыңғай қоғамдық кеңістікке айналмақ.

Сондай-ақ Руслан Өскенәлі «NAMYS» академиясының аумағында салынып жатқан ашық спорт алаңының құрылысымен танысты. Жоба аясында футбол алаңы мен воркаут аймағын салу қарастырылған.

Академияда күрес, күштік жаттығулар, ойын спорт түрлері мен би залдары бар. Сонымен қатар 150 орындық жатақхана жұмыс істейді. Мұнда спорттық дайындықты жалпы білім алумен қатар жүргізуге жағдай жасалған.

Жұмыс сапары кезінде «Жастар» саябағын қайта жаңғырту барысы да қаралды. Жобаның жалпы құны – 4,9 млрд теңге.

Саябақ аумағында жаяу жүргіншілер мен велосипед жолдары, субұрқақ, заманауи балалар алаңдары және көгалдандырылған демалыс аймақтары салынады. Жұмыстарды 2026 жылдың IV тоқсанында аяқтау жоспарланған.

Жезқазғандағы С.Қожамқұлов атындағы Қазақ музыкалық-драма театрының ғимаратында да күрделі жөндеу жүргізіліп жатыр. Бұл мақсатқа 5,1 млрд теңге қарастырылған. Жөндеу жұмыстары 2027 жылдың I тоқсанында аяқталуы тиіс.

Сәтбаев қаласында Руслан Өскенәлі Шахтер даңқы алаңын абаттандыру жұмыстарымен танысты. Кеншілердің еңбек дәстүріне арналған қоғамдық кеңістікті жаңарту жобасының құны – 3,3 млрд теңге.

Негізгі жұмыстарды 2026 жылдың IV тоқсанында аяқтау жоспарланған. Ал көгалдандыру жұмыстары 2027 жылдың II тоқсанына дейін жалғасады.

Сапар аясында Ұлытау университетіне де барды. Мұнда негізгі оқу корпусы мен спорт залының құрылысы аяқталуға жақын. Сонымен бірге 140 орындық жатақхана салынып жатыр.

Университетті дамыту өңір жастары үшін білім алу мүмкіндіктерін кеңейтуге және тау-кен, металлургия салаларына қажетті білікті мамандар даярлауға бағытталған.

Университет аумағында «Қазақмыс» басшылығы ағаш көшеттерін отырғызу шарасына да қатысты.

Сапар қорытындысында құрылыс жұмыстарының сапасына, белгіленген мерзімдердің сақталуына және жобалардың әрі қарай уақытылы жүзеге асырылуына ерекше назар аударылды.

Мәтінде көрсетілген жағалау, «Жастар» саябағы, театр және Шахтер даңқы алаңы жобаларының жалпы құны кемінде 16,7 млрд теңгені құрайды.

Бүгін, 14:35