Қазақстан Әзербайжан байланысы берік

Қазақстанның Әзербайжанмен қарым-қатынасы бауырластық пен сенімге негізделген.

Бұл туралы Әзербайжан Республикасының президенті Ильхам Әлиев Қазақстанға мемлекеттік сапары қарсаңында Kazinform агенттігіне берген эксклюзивті сұхбатында айтты. Ол екі ел арасындағы саяси диалогтың жоғары деңгейі, көлік-логистика мен мұнай-газ саласындағы ынтымақтастықтың қарқынды дамуы, сондай-ақ «жасыл» энергетика саласындағы бірлескен жұмыс пен Түркі мемлекеттері ұйымы аясындағы бастамалардың болашағы жайында тілге тиек етті.

Ильхам Әлиев, Әзербайжан Республикасының Президенті:

- Әзербайжан мен Қазақстан арасындағы саяси қарым-қатынас бүгінде жоғары өзара сенімділікпен сипатталады. Өткен онжылдықтарда тарихи тұрғыдағы бауырластық, достық және өзара қолдауға, ортақ түркі бірегейлігіне, ұқсас мәдени дәстүр мен рухани құндылықтардың берік іргетасына сүйене отырып, біз шын мәнінде нағыз стратегиялық және одақтас серіктестікті орнаттық. Екіжақты ынтымақтастықты нығайтуға ықпал ететін маңызды фактор ретінде белсенді және сындарлы диалогты атап өтер едім. Себебі осы іс-қимылдар жоғары деңгейде жүріп жатыр және барлық деңгейдегі мемлекетаралық қатынастарды жан-жақты тереңдетуге серпін беріп отыр.

Былтыр Әзербайжан мен Қазақстан арасындағы транзиттік тасымалдау 3,5 млн тоннадан асты. Бұл көрсеткіш алдыңғы кезеңмен салыстырғанда 20%-ға артқанын айғақтайды. Орта дәліз елдер арасындағы тұрақты және тиімді байланысты қамтамасыз етуде шешуші рөл атқарады. Мәселен, осыдан 3 жыл бұрын Ақтауда Орта дәлізді дамыту және пайдалану бойынша 2022-2027 жылдарға арналған Жол картасына қол қойылды. Бұл тұрғыда Түркия, Әзербайжан және Қазақстан арқылы өтетін аумақ қамтылған. Құжатта үш елдің көлік-логистикалық инфрақұрылымын қатар дамыту, жұмыстарды оңтайландыру, қосымша жүк ағынын тарту, бірыңғай тарифтік саясатты жүзеге асыру, логистикалық орталықтар желісін дамыту, басқа да негізгі мәселелерді шешу қарастырылған.