Қазақстан биыл 98 млн тонна мұнай өндіруді жоспарлап отыр

Қазақстан 2026 жылы 98 миллион тонна мұнай өндіруді жоспарлап отыр.
Бұл туралы Энергетика министрі Ерлан Ақкенженов Парламент Мәжілісінің жалпы отырысынан кейін журналистердің сауалына жауап беру барысында мәлімдеді.

Министрдің айтуынша, мұнай өндіру көлеміне әсер етуі мүмкін бірқатар факторлар ескерілген. Атап айтқанда, Теңіз кен орнындағы өндіріс көлемінің уақытша төмендеуі және Каспий құбыр консорциумының инфрақұрылымына жасалған шабуыл салдарынан туындаған тәуекелдер назарға алынған.

– Теңіз кен орнындағы мұнай өндірудің уақытша қысқаруы мен Каспий құбыр консорциумы нысандарына жасалған соққыларға қарамастан, биыл 98 миллион тонна мұнай өндіру жоспарланып отыр, – деді Ерлан Ақкенженов.

Энергетика министрлігінің мәліметінше, жоспарланған көрсеткішке қол жеткізу үшін еліміздегі ірі мұнай-газ жобалары тұрақты жұмысын жалғастырады. Сонымен қатар өндіріс көлемін сақтау және экспорттық міндеттемелерді орындау бағытында қажетті шаралар қабылдануда.

Айта кетейік, Қазақстан 2026 жылы сыртқы нарықтарға 76 миллион тонна мұнай экспорттауды көздеп отыр. Бұл көрсеткіш елдің экспорттық кірістерін сақтап, энергетикалық сектордың экономикалық өсімге қосатын үлесін қамтамасыз етуге мүмкіндік береді.

Сарапшылардың пікірінше, мұнай өндірісінің жоғары деңгейде сақталуы мемлекеттік бюджет кірістерінің тұрақтылығына, сондай-ақ еліміздің халықаралық энергетикалық нарықтағы позициясын нығайтуға ықпал етеді.