Қазақстан мен Ресей арасындағы дипломатиялық қатынасқа 33 жыл толды

АСТАНА, 22 қазан – Sputnik. 22 қазанда Қазақстан мен Ресей арасындағы дипломатиялық қатынастың орнағанына 33 жыл толды, деп хабарлады Қазақстан елшілігі.

Қазақстан мен Ресейдің қарым-қатынасы саяси мәдениеттің жоғары деңгейімен ерекшеленеді, стратегиялық әріптестік пен одақтастық рухында дамуда.

"Біздің көп ғасырлық ортақ тарихымыз, географиялық, рухани жақындығымыз және өзара сеніміміз екі ел арасындағы достық қарым-қатынастарды одан әрі дамыту үшін кепілдік болады", - деп жазылған хабарламада.

Өзара табысты іс-қимыл екі ел көшбасшылары арасындағы достық қарым-қатынастың нәтижесі, дейді дипломаттар.

Бұған Ресей президенті Владимир Путиннің 2024 жылғы 27 қарашадағы Қазақстанға мемлекеттік сапары, сондай-ақ Қазақстан президенті Қасым-Жомарт Тоқаевтың 12 қарашадағы Ресейге мемлекеттік сапары дәлел.

Жақында Путинмен кездесуде Тоқаев "Қазақстан мен Ресей Мәңгілік Одаққа, стратегиялық серіктестік пен достыққа бет бұрды" деді.

Ал Путин Ресей Қазақстанды өзінің адал досы және жақын одақтасы деп санайтыны туралы бірнеше рет айтқан болатын.

"Мен әлі де ерекше қарым-қатынаста екенімізді сенімді түрде айта аламын. Біздің жеке достық қарым-қатынасымыздың арқасында ғана емес, Қазақстан мен Ресей белгілі бір дәрежеде посткеңестік кеңістіктегі интеграциялық процестердің бастамашылары болғандығының арқасында", - деді Путин.

Мәскеу мен Астана екіжақты форматта да, соңғы онжылдықтарда еуразиялық кеңістікте қалыптасқан халықаралық ұйымдар мен интеграциялық құрылымдар шеңберінде де қарқынды саяси байланыстарды қолдайды. Олар: ЕАЭО, ҰҚШҰ, ТМД, ШЫҰ, АӨСШК және Орталық Азия+Ресей.

Сондай-ақ екі ел де Орталық Азия және Каспий өңірлерінде қауіпсіздікті нығайтуға, ынтымақтастықты дамытуға елеулі үлес қосуда. Сауда-инвестициялық, ғылыми-техникалық, мәдени-гуманитарлық және басқа да алмасулар қарқынды өсуде, өңіраралық байланыстар белсенді түрде жандануда.